भांगरभूंय | प्रतिनिधी
येरादारी संचालकाची म्हायती; येरादारी नेमांक पाळो दिनाशिल्ल्यांचेर खर कारवाय
पणजी: वाहनांचे गतीचेर नियंत्रण हाडपा खातीर राज्यांतल्या सगल्या रस्त्यांचेर भौशीक-खाजगी तत्वाचेर (पीपीपी) सीसीटीव्ही कॅमेरा बसोवपाची प्रक्रिया येरादारी खात्यान सुरू केल्या. सुरवातेक वाहनांची वर्दळ चड आशिल्ल्या 15 मार्गांचेर सीसीटीव्ही कॅमेरे बसयतले अशी म्हायती येरादारी खात्याचे संचालक राजन सातार्डेंकार हांणी ‘भांगरभूंय’ कडेन उलयतना दिली.
फाटल्या कांय म्हयन्यांत गोंयांतले अपघात आनी बळींचें प्रमाण वाडलां. तातूंत सोऱ्याचे घुंवळेंत वाहन चलयतना अपघात जाल्ल्याची संख्या चड आसा. हाचेर आळो घालपा खातीर येरादारी खात्यान खर पावलां उबारल्यांत. ताचोच वांटो म्हूण येरादारी नेमांचें उल्लंघन करप्यांचेर सुदारीत मोटार वाहन कायद्या प्रमाण दंड आकारपाचो आनी राज्यांतल्या सगल्याच रस्त्यांचेर सीसीटीव्ही कॅमेऱ्यांचे जाळे विणपाचो निर्णय सरकारान घेतला. ‘पीपीपी’ तत्वाचेर रस्त्यांचेर कॅमेरे बसयतले अशें येरादारी मंत्री मॉवीन गुदिन्हो हांणी दोन दिसां पयलीं पत्रकारां कडेन उलयतना स्पश्ट केल्लें.
हे फाटभुंयेर येरादारी खात्याचे संचालक सातार्डेंकार हांचे कडेन संपर्क सादलो तेन्ना रस्त्यांचेर सीसीटीव्ही कॅमेरा बसोवपाक सुरवात केल्या आनी पयल्या टप्प्यांत सेगीत वाहनांची वर्दळ आशिल्ल्या 15 रस्त्यांचेर सीसीटीव्ही कॅमेरे बसयतले. फुडल्या कांय दिसांनी हे विशींची भौशीक नोटीस जारी करतले. उपरांत उरिल्ल्या सगल्या रस्त्यांचेर कॅमेरे बसोवपाक सुरवात करतले अशें तांणी सांगलें.
गोंयांतल्या वाडट्या अपघातांचेर नियंत्रण दवरपा खातीर येरादारी खात्याच्या अधिकाऱ्यांनी कामाक सुरवात केल्या. हाचे मुखार नेमांक पाळो दिनाशिल्ल्यांचेर खर कारवाय करतले अशें तांणी म्हणलें. रातच्या वेळार सोऱ्याचे घुंवळेंत वा हेर कारणांक लागून येरादारी नेमांचे उल्लंघन करपी सीसीटीव्हींत कैद जातले. ते प्रमाण तांचेर कारवाय करतले अशेंय सातार्डेंकार हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
