भांगरभूंय | प्रतिनिधी
स्पा धनयाची अटकपूर्व जामिना खातीर धांव
म्हापशें: चंदगड (महाराष्ट्र) हांगासरल्या पर्यटक पंगडाचो छळ आनी लुबाडणूक प्रकरणांतल्या तिनूय दुबावीत आरोपींक थळाव्या न्यायालयान चार दीस पुलीस कोठयेंत दवरपाचो आदेश दिला. तशेंच त्या स्पा धनयाच्या अटकपूर्व जामिना खातीरची सुनावणी मंगळारा जातली.
फाटल्या 24 मे दिसा दनपारां 12.30 वरांचेर हो प्रकार घडिल्लो. जाल्यार आयतारा 29वेर म्हापशें पुलिशेंत कागाळ करतकूच पुलिसांनी दुबावीत सचीन राजकुमार भारद्वाज (26, पालवल हरियाणा), आशीष जगीर सिंग (27, गुरगांव हरियाणा) आनी मुबारक अली मौला (20, नायकावाडो कळंगूट, मूळ तामीळनाडू) हांकां केल्ली.
ह्या प्रकरणांत पुलिसांनी दुबावितां आड भादंसंच्या कलम 347, 504, 323, 395, 506 (2), 298 आनी 34 खाला गुन्यांव नोंद केल्लो.
सोमारा वयल्या तिनूय दुबावितांक हांगासरल्या न्यायालया मुखार पुलिसांनी हजर करतकूच न्यायालयान तांकां चार दीस पुलीस कोठयेंत दवरपाचो आदेश दिला.
कागाळदार पिडीत 11 जाणांच्या गटा कडल्यान दुबावितांनी 1 लाख रोख, एक भांगराची सरपळी आनी मुदी मेळून 1 लाख 80 हजारांचो म्हालवज लुटिल्लो. हातूंतलो म्हालवज पुलिसांक अजून सांपडिल्लो ना.
दुबावीत सचीन भारद्वाज हाच्या गुगल पे क्रमांकाचेर पिडीत तरणाट्यांच्या सोयऱ्यांनी आनी इश्टांनी पयशे धाडिल्ले. दुबाविताचें बँक खातें गोठोवपाची तयारी पुलिसांनी चलयल्या.
ह्या प्रकरणांत अजून कांय दुबावितांचो सोद पुलीस घेतात. ते सांपडले उपरांत वयल्या लुटमारीतलो म्हालवज पुलिसांच्या हाताक लागपाची शक्यताय आसा.
हो प्रकार घडिल्ल्या एनडीओर हेअर अॅण्ड ब्युटी पार्लर ह्या स्पाची धनी आशिल्ले ते बायलेन अटक टाळपा खातीर न्यायालयांत अटकपूर्व जामीन अर्ज दाखल केला. ह्या अर्जाचेर अतिरिक्त जिल्हो आनी सत्र न्यायालयांत मंगळारा सुनावणी जातली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
