घरां, फ्लॅट जातले म्हारग

भांगरभूंय | प्रतिनिधी

50 लाखां वयल्या वेव्हारांनी स्टॅम्प ड्युटयेंत वाड

50 लाखां मेरनेच्या खरेदी वेव्हारांचेर 3 टक्के (बदल जावंक ना)
50 लाखां वयर ते 75 लाखां मेरेनच्या मालमत्ता खरेदीचेर 4 टक्के
75 लाखां वयर ते 1 कोटी मेरेनच्या खरेदी वेव्हारांचेर 4.5 टक्के
1 कोटी परस चड ते 5 कोटीं मेरेनच्या मालमत्ता खरेदीचेर 6 टक्के

भांगरभूंय I प्रतिनिधी
पणजी : सरकारान 50 लाखां वयल्या खरेदी वेव्हारां वयली ‘स्टँप ड्युटी’ वाडयिल्ल्यान गोंयांत अालिशान घरां तशेंच फ्लॅटांच्या मोलांत आनीक वाड जातली. गांवगिऱ्या वाठारांतल्या घरांच्या मोलांत चड फरक पडचो ना. पणजी, म्हापशें, मडगांव, फोंडें, वास्को ह्या शारांतली घरां तशेंच फ्लॅटांचें मोल मात वाडटलें. हाचो फटको सामान्यांक बसचो ना जाल्यार गिरेस्तांक बसतलो, अशी म्हायती संबंदीत सरकारी अधिकाऱ्यान दिली.

सरकारान 50 लाखां मेरेनच्या स्टँप ड्युटयेंत वाड जावंक ना. ती पयलीं भशेन 3 टक्केच आसा. 50 लाखां वयर ते 75 लाखां मेरेनच्या वेव्हारांचेर स्टँप ड्युटी 3.5 टक्के आशिल्ली. आतां ती 4 टक्के केल्या. 75 लाख ते 1 कोटी मेरेनच्या वेव्हारांचेर स्टँप ड्युटी 4 टक्के आशिल्ली, ती आतां 4.5 टक्के जाल्या. 1 कोटी ते 5 कोटी मेरेनच्या वेव्हारांचेर पयलीं 4.5 टक्के स्टँप ड्युटी आशिल्ली. ती आतां 5 टक्के जाल्या. 5 कोटीं परस चड वेव्हारांचेर पयलीं 5 टक्के स्टँप ड्युटी आशिल्ली. ती वाडून आतां 6 टक्के जाल्या.
सरकारान 50 लाखां मेरेनच्या खरेदी वेव्हारांचेर स्टँप ड्युटी वाडोवंक ना. पयलीं भशेन ती 3 टक्के आसा. 5 कोटी मेरेनच्या वेव्हारांचेर पयली परस 0.5 टक्के स्टँप ड्युटी वाडयल्या. 5 कोटी परस चड वेव्हारांचेर 1 टक्के स्टँप ड्युटी वाडयल्या. हाका लागून 50 लाखां परस चड मोलाचें फ्लॅट वा घरां वा जमीन आनीक म्हारग जातली.
विक्री/ खरेदी वेव्हारांनी फरक बरोच पडटलो
1 लाखा मेरेनच्या वेव्हारांचेर 3 टक्के स्टँप ड्युटी धरली जाल्यार स्टँप ड्युटीचें मोल 3 हजार रुपया जाता. हाचो अर्थ 50 लाखांच्या खरेदी वेव्हारांचेर देड लाख रुपया स्टँप ड्युटी फारीक करची पडटा. 50 लाखां मेरेनच्या स्टँप ड्युटयेंत बदल जावंक ना. एक कोटीच्या वेव्हारांचेर स्टँप ड्युटी साडे चार लाख रुपया जाता. पयलीच्या दराचो विचार केलो जाल्यार 50 हजार रुपया चड फारीक करचे पडटले.
5 कोटीं परसच्या चड वेव्हारांचेर 30 लाखां परस चड मोल स्टँप ड्युटी जाता. पयलीं परस 10 लाख रुपया चड फारीक करचे पडटले.
अालिशान घरां/फ्लॅट सामान्यांच्या आवाक्या भायर
पणजी, वास्को शारांत डबल बेड रूम फ्लॅटाचें मोल 60 ते 70 लाख रुपया आसा. स्टँप ड्युटयेक लागून हें मोल आनीक 7 ते 8 लाखांनी वाडटलें. अालिशान फ्लॅटाचें मोल 1 कोटी परस चड आसा. ताचेर 15 लाखां वयर स्टॅम्प ड्युटी लागतली. म्हापशें, मडगावां लेगीत डबल बेड रूम फ्लॅटाचें मोल 50 लाखां परस चड आसा. सांखळे, दिवचले, वाळपय , सांवड्ड्या डबल बेड रूम फ्लॅटाचें मोल 50 लाखां परस उणें आसा. हाचो अर्थ सांखळी, दिवचल, वाळपय, सांवड्ड्यां हो वाठार सोडलो जाल्यार हेर शारांनी डबल बेड रूम फ्लॅटाचें मोल आनीक वाडटलें. शारी वाठारांनी घर बांदतलो जाल्यार लेगीत 500 चौखण मिटर जाग्याचें मोल 50 लाखां परस चड जाता. स्टँप ड्युटयेक लागून हे मोल आनीक वाडटलें.
गोंयांत फ्लॅट घेवप वा घर घेवप सामान्य मनशाक सध्याच परवडना. स्टँप ड्युटी वाडिल्ल्यान ते सामान्यांच्या आवाक्या भायर वतले. डिझेल आनी पॅत्रॉल वाडलें, जाल्यार भाजयां सयत हेर वस्तुंचें मोल वाडटा. स्टँप ड्युटयेक लागून जाग्या सयत फ्लॅटाचें मोल वाडटलें. बांदकाम उद्देजकां मुखार सध्या बऱ्योच आडखळी आसात. रेंव तशेंच चिरे मेळनात. आतां स्टँप ड्युटी वाडिल्ल्यान तयार फ्लॅटांची मागणी देंवतली, अशें संदीप निगळ्ये हांणी सांगलें.

सामान्यांक फटको बसचो ना : मांगिरीश पै रायकार
सरकारान 50 लाखां मेरेन स्टँप ड्युटी वाडोवंक ना. हाका लागून सामान्यांक फटको बसचो ना, अशें गोवा चेंबरचे आदले अध्यक्ष तशेंच उद्देजक मांगिरीश पै रायकार हांणी सांगलें. सरकाराक महसुलाची गरज आसता. हाका लागून खंय ना खंय शुल्क वाडोवचें पडटा. जे कोण 1 कोटी वा 5 कोटीं परस चड रुपयांचो वेव्हार करतात. तांची म्हयन्याची वा वर्सुकीं येणावळ चड आसता. ताका लागून सामान्यांक फटको बसचो ना, अशें मांगिरीश पै रायकार हांणी सांगलें.

सामान्यां सयत बांदकाम वेवसायिकांक फटको : संदीप निगळ्ये
फोंडें शारांत सिंगल बेड रूम फ्लॅटाचें मोल 30 लाख रुपया आसा. डबल बेड रूम फ्लॅटाचें मोल 55 ते 60 लाख आसा. कंपनीचे अधिकारी तशेंच विदेशांतल्यान गोंयांत आयिल्ले बरेच जाण डबल बेड रूम फ्लॅट सोदतात. तांकां आतां फ्लॅट घेवप परवडचें ना. फोंडें वाठारांत बंगलो बांदतलो जाल्यार 1 कोटीं परस चड खर्च येता , अशें बांदकाम उद्देजक संदीप निगळ्ये हांणी सांगलें.