भांगरभूंय | प्रतिनिधी
शिरोडवाडी मुळगांव हांगाच्या श्री व्हडली वनदेवता संस्थानांत बुधवार ता. 27 एप्रिलाक श्री व्हडली वनदेवीचो वर्धापनदीस व्हडा दबाज्यान मनयतले. वर्धापन दिसा निमतान दनपरां साडे अकरांक ‘हे माये वनदेवी’ हें कोंकणी भक्तीगीत आनी श्री वनदेवी स्तोत्राच्या ध्वनीफितीचें उक्तावण करतले.
ध्वनीफीत आनी चित्रगीताची निर्मणी सिद्धेश म्हांबरे हांणी केल्या. हालींच मंगळुरांत विमला पै पुरस्कार फावो जाल्ले कवी उदय नरसिंह म्हांबरो हांणी हें गीत बरयलां जाल्यार नामनेची गायिका गौतमी हेदे बांबोळकार हांणी स्वता चाल लावन हें गीत गायलां.
गौतमीन गायिल्ली ’देवा दामोदरा’ आनी ’शांतादुर्गा आई’ हीं गीतां हाचे आदीं खूब गाजल्यांत. ह्या गीताक अक्षय नायक हांणी संगीत दिलां तर छायाचित्रण माहीम भांडारी आनी मांगिरीश बांदोडकर हांणी केलां. ह्या चलचित्रान सावनी, काव्या, वेदा आनी अनुरा म्हांबरे ह्या बालकलाकारांनी वांटो घेतला. चित्रफितीचें निर्देशन कलानंद बांबोळकार हांणी केलां. हे कार्यावळीक श्री व्हडली वनदेवता संस्थानचे अध्यक्ष शंकर महांबरे अध्यक्ष म्हण हाजीर आसतले तर श्री धाकटी वनदेवता संस्थानचे अध्यक्ष मोहन धोंड मुखेल सोयरे आसतले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
