भांगरभूंय | प्रतिनिधी
वाळपयः अखील गोमंतक क्षेत्रीय मराठा समाजा वतीन आयोजीत केल्ल्या गोंय राज्य पांवंड्या वयले क्रिकेट लीग सर्तींत सत्तरी वॉरियर्स ह्या सत्तरी तालुको पंगडान वस्तादपण मेळयलें. तांणी दिवचलच्या पंगडाक हारोवन रोख 75000 रुपये आनी आकर्शक करंड मेळयलो. तालुको पांवड्या वयले हे सर्तींत सगल्या तालुक्यांच्या पंगडांनी वांटो घेतिल्लो.
दिवचल तालुको पंगडान पयलीं खेळून 5 ओव्हरींत 40 धांवड्यो केल्यो. सत्तरी पंगडान 4.2 ओव्हरींत ह्यो धांवड्यो करून 10 विकेटींनी जैत मेळयलें. सर्तीची फायनल मडगांवां जाली. सत्तरी पंगडाची मालकी उद्देजक प्रशांत देसाय हांचे कडेन आशिल्ली. तांणी आपल्या खेळगड्यांक उर्बां दिवन सर्त जिखपाक योगदान दिलें.
दिवचलचो आमदार डॉ चंद्रकांत शेट्ये इनाम भेटवण कार्यावळीक मुखेल सोयरो म्हणून हाजीर आशिल्ले. समाजाच्या उत्कर्शा खातीर सगल्यांनी एकसंध जावून काम करपाक जाय अशें तांणी सांगलें. गोमंतक क्षत्रीय मराठा समाजाचे अध्यक्ष निवृत्त पुलीस अधिकारी महेश गांवकार हांणी सर्त आयोजीत करपा फाटलो हेत सांगलो. फुडाराक वेगवेगळ्या उपक्रमांतल्यान समाज जाग्रुताय करपाचें काम करतले अशें तांणी सांगलें.
मानेस्तांचे हस्तुकी इनामां भेटयलीं. सत्तरी पंगडाच्या संदेश ठाकूर हाची मॅन ऑफ दी मॅच म्हणून निवड केली. शंकर गांवकार, चेतन सावंत, अभिजीत गांवकार, सिद्धर्थ झर्मेकार, महेश तळपी, सिद्धेश गवस, शिवानंद गांवकार, कृष्णकांत माजीक आनी अभिजीत दळवी ह्या खेळगड्यांक इनामां फावो जाली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
