भांगरभूंय | प्रतिनिधी
भांगरभूंय प्रतिनिधी
मडगांव : गोंय मुक्ती चळवळींत वांटो घेतिल्ले जेश्ट सुटके झुजारी गोपाळ नारायण चितारी (86) हांकां शुक्रारा 13 मेक सकाळी 9.30 वरांचेर मरण आयलें. तांकां राष्ट्रपतींच्या हस्तुकी राष्ट्रीय शिक्षक पुरस्कार फावो जाल्लो. ते समाजकारणात सक्रिय आशिल्ले. तांचे कुडीचेर देमानी- कुंकळ्ळे हांगा निमणे संस्कार केले. तांच्या फाटल्यान घरकान्न स्वाती, पूत नीलेश, धूव, जांवय, नातू, नांतरा असो घराबो आसा.
तांच्या मरणाक लागोन कुंकळ्ळी मतदारसंघाचो आमदार युरी आलेमांव हांणी दुख्ख उक्तायलां. चितारी हांणी गोंय मुक्ती चळवळी वेळार केल्ल्या वावराचो सदांच उगडास उरतलो अशें तांणी म्हणलां. बाळ्ळी रणसंग्राम समितीचे अध्यक्ष रोहिदास नायक हांणी एका बऱ्या सभावाच्या स्वातंत्र्य सैनिकाक मरण आयलें अशें सांगलें. बाळ्ळी रणसंग्राम समितीचे ते वांगडी आशिल्ले आनी आपल्याक तांचें मार्गदर्शन मेळटालें अशे सांगून तांच्या घरच्यांच्या दुख्खांत आमी वाटेकार आसात अशें म्हणलें. मडगांवचे आमदार दिगंबर कामत, कुंकळ्ळी पालिकेचो नगराध्यक्ष लक्ष्मण नायक, नगरसेवक उद्देश भिकू नायक देसाय हांणी दुख्ख उक्तायलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
