भांगरभूंय | प्रतिनिधी
हिंदी सिनेसृश्टीचो फामाद गायक आनी संगीतकार के. जे. येसुदास हांचो आयज 10 जानेवारीक 83 वो वाडदीस. तांचें मूळ नांव कट्टास्सेरी जोसफ येसुदास. आपल्या म्होंवाळ आवाजान हिंदी सिनेमा मळार नामना जोडपी गायकां मदीं येसुदास हें एक म्हत्वाचें नांव. 10 जानेवारी 1940 दिसा मल्याळम क्रिस्तांव कुटुंबांत जल्मल्ल्या येसुदास हांचे बापूय मल्याळम शास्त्रीय संगीतकार आशिल्ले. संगीताचे मुळावे धडे तांकां बापाय कडल्यान मेळ्ळे. पिरायेच्या सातव्या वर्सा कोच्चींतले थळावे सर्तींत वांटो घेवन तांणी भांगरा पदक मेळयलें. कन्नड, मलयाळम, तेलुगू आनी तमिळ अशा सगळ्या दक्षीण भारतीय भाशांनी आनी मराठी, कोंकणींतूय तांणी गायलां. ताचीं भोवतेक हिंदी, मल्याळम, तमीळ गितां हिट जाल्यांत. तांच्या आवाजान परदेशांतल्या फॅन्सांकय आकर्शीत केलां.
1965 वर्सा रशियन सरकारान तांकां गावपाचें खाशेलें आमंत्रण दिल्लें. येसुदास आपल्या गोड, मखमली आवाजा खातीर वळखूंक लागले. तांच्या गोड आनी मखमली आवाजाची नामना हिंदी फिल्म मळार पावली ना जाल्यार अजाप. संगीतकार सलील चौधरी हांणी तांकां दिग्दर्शक बासू चटर्जी हांच्या ‘छोटी सी बात’ ह्या सिनेमा खातीर एक गीत गावपाक लायलें. बासूदा तांच्या आवाजान प्रभावित जाले आनी तांकां आनीक एक गीत दिवपाची आॅफर केली.
1970 सावन येसुदास हांणी हिंदी गितां गावपाक सुरवात केली. ‘जानेमन जानेमन तेरे दो नयन’ ह्या गीता उपरांत बॉलिवूडान येसुदासाचो आवाज शांत, सज्जन सामान्य मनशाच्या भुमिका करपी अमोल पालेकार हांकां सोबता, अशें बाॅलिवूड संगीतकारांक जाणवलें. येसुदासाच्या म्होंवाळ आवाजान जायत्या संगीतकारांक आकर्शीत केलें, पूण येसुदास हांणी आपलीं गितां बारीकसाणेन वेंचून काडलीं.
येसुदास हांणी फकत अमोल पालेकारा खातीर न्हय तर अमिताभ बच्चन आनी जितेंद्रा खातीरय गायन केलें. रवींद्र जैन, भप्पी लाहिरी, खय्याम, राजकमल, सलील चौधरी ह्या संगीतकारां कडेन तांणी जायतीं सदाबहार अशीं हिंदी सिनेगितां गायल्यांत. येसुदास हांणी एकूण 45 हजार पदां गायल्यांत. सध्याची गितां शैली तांकां आवडना म्हणून तांणी फाटलीं जायतीं वर्सां गावप बंद केलां.
येसुदास हांकां जायते पुरस्कार मेळ्ळ्यात. भारत सरकारान 2002 वर्सा तांकां पद्मभूषण, तर 2017 त पद्मविभूषण हो किताब दिलो, जाल्यार केरळ सरकारान संगीतांतल्या उत्कृश्टताये खातीर ‘स्वाती पुरस्कारम्’ हो पुरस्कार दिवन तांचो भोवमान केलो. तांकां राश्ट्रीय पुरस्कारूय मेळ्ळ्यात. येसुदास हांणी दक्षीण भारतीय भाशांनी कांय चित्रपटय निर्माण केल्यात. ‘गोरी तेरा गांव बडा प्यारा, सुरमई अखियों में, दिल के तुकडे तुकडे करके, ओ गोरियाँ रे, जब दीप जले आना, मुहब्बत बडे काम की चीज है, तेरी तस्बीर को, कहाँ से आए बदरा, मधुबन खुशबू देता है, ए मेरे उदास मन, श्याम रंग रंगा रे, जानेमन जानेमन तेरे दो नयन, चांद जैसे मुखडे पे…. हीं येसुदास हांणी गायिल्लीं कांय गितां आयज लेगीत लोकप्रिय आसात. सदमा, चितचोर, छोटी सी बात, त्रिशुल, नैय्या, दादा, सावन को आने दो, साजन बिना सुहागन, चष्मे बद्दूर हे तांचीं पदां आशिल्ले कांय चित्रपट. ‘मधुकाव्याचें रती तू…’ हें एक कोंकणी पद तांच्या नांवार आसा.
येशूदास आनी तांची घरकान्न प्रभा हांकां आठ वर्सां भुरगें नाशिल्लें. तें जालें तेन्ना ताका घेवन तीं साबरीमला देवळांत गेल्लीं. ही घडणूक तेन्ना गाजिल्ली. उपरांत तांच्या दुसऱ्या पुताच्या जल्मा वेळार क्रिस्तांव धर्मगुरून ते देवळांत गेले म्हूण बाप्तिज्मा करपाक न्हयकार दिल्लो. तेन्ना वाद जाल्लो. गुरूवायूरांतल्या श्रीकृष्णाच्या देवळांत येसुदास हांकां क्रिस्तांव म्हूण गांवपाक दिवंक ना. साबरीमलांतूय तांकां प्रवेश दिवपा वेळार वाद जाल्लो. मात उपरांत फक्त भटानूच अंगाईगीत गावपाची परंपरा मोडून येसुदासान गायिल्लें गीत ते वाजोवपाक लागले. आतां साबरीमलांत सद्दां येसुदासाचें अंगाईगीत सीडीचेर वाजोवन देवाक न्हिदोवपाचो विधी जाता.
गोड आनी मोनेळ घालपी आवाजाचो गायक येसुदास हांकां वाडदिसाचीं परबीं!
श्याम ठाणेदार
9922546295
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
