गोंय सायन्स सेंटराक भेट दिवप्यांचो आंकडो वाडलो

भांगरभूंय | प्रतिनिधी

पणजी ः मनरिजवण पद्दतीन म्हायती दिल्यार कठीण दिसपी विज्ञान विशय लेगीत सोपो जाता. मिरामारांतलें विज्ञान केंद्र (सायन्स सेंटर) ह्या धोरणाचेर काम करता. विज्ञान संकल्पना हांसप, खेळl आनी प्रदर्शन हांचे वरवीं स्पश्ट करतात. हाकाच लागून फाटल्या कांय वर्सांत विद्यार्थी तशेंच सामान्य नागरिक व्हड प्रमाणांत विज्ञान केंद्राक भेट दितात. फाटल्या वर्साच्या तुळेंत अंदूं ह्या केंद्रांत येवपी लोकांचो आंकडो वाडला.
विज्ञान केंद्राच्या अधिकाऱ्यां कडल्यान मेळिल्ले म्हायती प्रमाण, 2023-24 अर्थीक वर्सा वट्ट 2 लाख 48 हजार लोकांनी विज्ञान केंद्राक भेट दिली. जाल्यार 2024-25 वर्सा हो आंकडो वाडून 2 लाख 70 हजार जालो. फाटल्या तीन वर्सांच्या तुळेंत 2024-25 वर्सा ह्या केंद्राक सगळ्यांत चड व्यक्तींनी भेट दिली. 2024-25 अर्थीक वर्सा सुमार 40 हजार विद्यार्थ्यांनी ह्या केंद्राक भेट दिली. फाटल्या चार अर्थीक वर्सांतलो हो सगळ्यांत चड आंकडो.
कोविडाक लागून 2019-20 आनी 2021-22 वर्सां विज्ञान केंद्राक भेट दिवपी विद्यार्थ्यांचो आंकडो सामको उणो आशिल्लो. गोंय विज्ञान केंद्राची लोकप्रियता वाडत आसा. 2009-10 ते 2024-25 ह्या काळांत 20 लाखां परस चड लोकांनी ह्या केंद्राक भेट दिल्या. फाटल्या कांय वर्सांत विद्यार्थ्यांच्या तुळेंत केंद्राक भेट दिवपी सामान्य लोकांचो आंकडो वाडला. केंद्रांत बेगीनूच ह्युमन गायरोस्कोप बसयतले. केंद्रान आयोजीत केल्ल्या विज्ञान कार्यशाळा आनी सर्तींकय बरो प्रतिसाद मेळटा अशें अधिकाऱ्यांनी सांगलें.
मजगतीं, 2020-21 वर्सा 15,101, 2021-22 वर्सा 23,742, 2022-23 वर्सा 1,31,000, 2023-24 वर्सा 2,48,000 आनी 2024-25 वर्सा 2,70,000 जाणांनी विज्ञान केंद्राक भेट दिली.

वेगवेगळ्या कार्यावळींचें आयोजन

केंद्रांत आंतरराष्ट्रीय संग्रहालय दिसा निमतान आयतारा (18 मे) सगळ्यांक मुफत प्रवेश दिल्लो. तशेंच १८ ते २० मजगतीं वेगवेगळ्या कार्यावळींचें आयोजन केलें.

वेगवेगळें आकर्शण

विज्ञान केंद्रांत थ्रीडी शो, तारांगण (प्लॅनेटोरीयम), वैज्ञानिक उपकरणां, सायन्स पार्क, प्रागैतिहासिक पार्क अशीं वेगवेगळीं आकर्शणां आसात. हातूंत प्लॅनेटोरीयमाचे सगळ्यांत चड आकर्शक आसा. 2024-25 वर्सा विज्ञान केंद्राक भेट दिवपी वट्ट लोकांतले सुमार 80 टक्के लोकांनी ह्या प्लॅनेटोरीयम भेट दिल्या अशें अधिकाऱ्यांनी सांगलें.