भांगरभूंय | प्रतिनिधी
निकाल जाहीर करपाची खंय गोंय विद्यापिठांत पद्दत ना. कोण सिलॅक्ट जातात तांकां खंय डायरेक्ट कामाक आपयतात. आतां आपुण सिलॅक्ट जालो ना तें कशें कळपाचें काय विचारल्यार ‘आरटीआय घालपाची’ म्हूण जाप मेळ्ळी.
गोंय विद्यापिठांत कांय दिसां फाटीं नोकर भरती जाल्या. मात तातूंत मोठो घोळ जालां, अशें दिसता. 22 ऑक्टोबर 2022 दिसा गोंय विद्यापिठाचे वेबसायटीर एक जायरात आयिल्ली. तातून एलडीसी पदा खातीर जागे आशिल्लें. पुराय गोंयांतल्यान लागीं- लागीं 2500 भुरग्यांनी अर्ज केल्ले. त्या पदांची लेखी परिक्षा विद्यापिठान 5 मार्चाक घेतिल्लीं. मात, जालां अशें की निकाल जाहीर करचे पयलींच पांच जाणांक कायम पदाचेर (पर्मनेंट पोस्ट) कामार घेतल्यात. तांचे वयल्यान गोंयांत सरकारी नोकरी जाय आसल्यार कशे फावर मारचे पडटात, ते आनीक सांगपाची गरज उरना. हें सगलें लक्षांत येतकच एकल्या भुरग्यान गोंय विद्यापीठाक आरटीआय घालून म्हायती मागली. मात तिका कितें ना कितें कारणां मुखार काडून शेवटाक कांयच म्हायती दिवपाक न्हयकार दिलो. ताचे वयल्यान कळटा की कशे फावर मारून नोकरेक लागचें पडटा तें.
पांच जाण कामार जॉयन जाल्याय. तातूंतलो एकलो 5 मेक जॉयन जाला. उपरांत तीग जाण 11 मेक नोकरेर जॉयन जाल्यात. एकलो 17 मेक नोकरेक जॉयन जाला. म्हणल्यार निकाल जाहीर जालो त्याच्या दुसऱ्या दिसा. ही म्हायती विधानसभेंत विचारिल्ल्या एका प्रस्नाक लेखी उत्तरांतल्यान मुख्यमंत्र्यांनी दिल्या. तातूंल्यान सगलें उक्ताडार आयलें. मात, हो प्रकार मुख्यमंत्र्याक खबर ना काय असो प्रस्न पडटा. रिजल्ट 16 मेक वेबसायटीर येता आनी परिक्षेक बशिल्लें काय जाण कामाक पयलेंच कशें येवपाक लागले हें कळटकच एकल्या उमेदवारान गोंय विद्यापिठान तांचे वेबसायटीर दिल्ल्या नंबराचेर फोन केलो. तेन्ना गोंय विद्यापिठांतल्यान ताका म्हायती म्हेळ्ळी ती सामकी शाॅकाद करपा सारकी. ती म्हळ्यार निकाल जाहीर करपाची खंय गोंय विद्यापिठांत पद्दत ना. कोण सिलॅक्ट जातात तांकां खंय डायरेक्ट कामाक आपयतात. आतां आपुण सिलॅक्ट जालो ना तें कशें कळपाचें काय विचारल्यार ‘आरटीआय घालपाची’ म्हूण जाप मेळ्ळी. ते जापे उपरात मागीर त्या उमेदवारान गोंय विद्यापिठांत आरटीआय घाली. मात ताचो टायम पळयात. आरटीय घाल्या 16 मेक आनी तेच दीस वेबसायटीचेर निकाल झळकुपाक लागलो.
त्या पयलीं अशे प्रकार घडटात तें सारके न्हय म्हूण लक्षांत येतकच एकल्या उमेदवारान मुख्यमंत्र्या सयत कांय कचेरींक मेल करून कागाळ केल्ली. कागाळी आनी आरटीआय पडटा तें लक्षात येतकच गोंय विद्यापिठान उरिल्ल्याक शांत करपाक निकाल रोखडोच वेबसायटीर जाहीर केलो. मात अशें कशें जावं येता हाची सुत्रा कडल्यान चवकशी करपाक सुरू केली, तेन्ना ताका एक- एक म्हायती मेळत रावली. कांय जणा कडल्यान म्हायती मेळ्ळ्या, त्या प्रमाण गोंय विद्यापीठांत खंय सारके ‘फामिल राज’ चल्लां. थंय पयलीं काम करताले तांचे फामिलीकूच खंय उपरांत तयार जाल्ल्या पदां खातीर वेंचून काडल्यात. ही खंय थंय परंपरा जाल्या. मात अशेंच चल्लें जाल्यार मुखार कशें जावपाचें काय, असो खुब जाणांक प्रस्न पडपाचोच. थंय काॅण्ट्रेकार धा- धा वर्सां काम केल्ल्या भुरग्याक निमणें काडून उडयले आनी फिक्स करतना भलत्याकूच संद दिली. ताका लागून पयलीं काम करपी भुरगेय बेजार जाल्ले. तांणी सगल्या थरांचेर कागाळी केल्यो. मात ताका एकूच जाप गोंय विद्यापिठा कडच्यान मेळ्ळ्या. ती म्हल्यार गोंय विद्यापिठान खंय तांकां परिक्षेक बसपाची संद दिल्ली. तातूंत ते पास जालें नात. मात आतां प्रस्न उपरासता तो म्हळ्ळ्यार जर तांकां इतलें कळनाशिल्लें जाल्यार फाटलीं धा वर्सां ते थंय कितें काम करताले तर? हाची जाप मात गोंय विद्यापिठा कडेन आजून तरी ना.
हें प्रकरण कांय जाणांनी बातमी दिवन लोकां मुखार हाडलें. तरी सरकारान मात हाचेर अजून तरी काय हालचाली केल्ल्यो दिसनात. अजापाची गजाल म्हळ्ळ्यार विरोधकूय हें प्रकरण लावन धरपाक पावले नात. सारके अधिवेशना वेळार हें प्रकरण उक्ताडार आयलें खरे, मात अधिवेशनांत एकाय विरोधकान हाचेर सरकाराक जाप विचारली ना. हाचे वयल्यान एक मात स्पश्ट जाता की जे विरोधक म्हण्टा की सरकाराचीं सगलीं ‘स्कॅमां’ आमी अधिवेशनांत काडटात म्हूण, तांकां हें स्कॅम दिसना काय..? जेन्ना कांय जाणांक कामा वेल्यान काडिल्लें तेन्ना कांय जाण विरोधी आमदारां कडेन आशेन गेल्ले तेन्ना कांय पक्षांनी पत्रकार परिशद घेवन आपलो तेंकोय जाहीर केलो. मात फुडें किते केलें तें मात आजून कोणेच सांगलें ना. फकत लोकांक दाखोवपा खातीर कांय जाण पत्रकार परिशद घेताले काय, अशें आतां दिसपाक लागलां. आमी पळयलें की मणिपुरच्या विशया वेल्यान विरोधक कशें एकठाय आयले. मात, गोंयच्या विशयांचेर विरोधक तशें एकठांय मात केन्नाच दिसनात. हें प्रकरण घेवन एकूय विरोध पक्ष मात कोर्टां गेलो ना, जावं कायदेशीर कितें करतना दिसलो ना. हाचे वयल्यान एक मात कळटा की हे विरोधक उलयतात तें फकत आपलो फायदो पळोवन आनी तांकां कांय पड्डिलें ना. खंयचोय विशय घेतलो आनी आपुण आसा हें लोकांक कळपाक जाय म्हूण अधिवेशनांत बोवळ केलो काय जालें. इतल्यारुच थांबपाचें. तो विशय लोकां खातीर कितलो म्हत्वाचो आसा, हाचो विचार मात करपाचें विरोधकाक केन्नाच सुचलें ना.
सत्ताधारी पक्षांतल्या आमदारांक काय पडिल्लेंच ना, हें आतां सांगपाची गरज ना. गोंय सरकार एके वाटेन सरकारी नोकर भरतेंत पारदर्शकताय हाडपाचो यत्न करता ताचें कितें काय? हो प्रस्न सगल्यांकूच पडपाचो. गोंयचें एकुलतें एक विद्यापीठ आनी थंय जर अशें जावपाक लागलें जाल्यार सरकारी खात्यांनी कितें परिस्थिती आसतली, ताचो फक्त विचार करात. आमच्या गोंयांत कितलोय बरो शिक, जावं कितले बरे गुण घे शेवटाक आमदार, मंत्र्यांच्या पायां कडेन वचना तो मेरेन सरकारी नोकरी तरी मेळपाची ना हें आतां शाळेंतूच भुरग्यांक शिकोवपाचो वेळ आयला. आनी अशी ‘स्कॅमा’ करपी विद्यापिठानूच आतां ते खातीर फुडाकार घेवचो पडटलो. कितलेंशेच कोटी मोडून पसून गोंय विद्यापिठाक आपलो पांवडो वळेरेंत वयर हाडपाक जमना. मात असले प्रकार मात करपाक कळटात. सरकारान आनी गोंय विद्यापिठान कोण कोर्टांत वता काय हाची वाट पळोवची न्ही. जाल्यार अशा प्रकरणाची वेळारुच चवकशी करची आनी सरकारानूय सांगचें की हें ‘स्कॅम’ न्हय जाल्यार आनीक कितें?
ज्ञानेश्वर वरक
कासारवर्णे- पेडणे
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
