भांगरभूंय | प्रतिनिधी
भांगरभूंय । प्रतिनिधी
पणजीः गोंय विद्यापीठ ग्रंथालय आनी गोंय कॉलेज ऑफ लायब्ररी असोसिएशनाच्या जोड पालवान आधुनीक ग्रंथालयाचे नवे कल, आव्हाना आनी संद ह्या विशयाचेर एक दिसाच्या राष्ट्रीय पावंड्या वयली परिशद विद्यापीठ सभाघरांत जाली.
मुखेल सोयरे म्हणून गोंय विद्यापिठाचो कुलगुरू प्रा हरिलाल मेनन, डीडी कोसंबी सामाजीक शास्त्र विभागाचे डीन प्रा. गणेश सोमय्याजी, मुखेल वक्ते म्हणून वाचनालय म्हायती विज्ञान अकादमीचो अध्यक्ष डॉ पीव्ही कोन्नुर, गोंय विद्यापिठाचो ग्रंथपाल डॉ संदेश देसाय, गोंय कॉलेज ऑफ लायबरी संघाचो अध्यक्ष बाळा मांद्रेकार हाजीर आशिल्ले. मानेस्तांचे हस्तुकीं दिवली पेटोवन परिशदेक सुरवात जाली.
परिशदेंत मानेस्तांनी आपले मोलादीक विचार मांडले. आधुनीक ग्रंथालयां कशी आसची, साधन सुविधा वाचकां मेरेन कश्यो पावोवपाक जाय हे विशीं नियाळ घेतलो. निवृत्त ग्रंथपालांचो ह्या वेळार हरिलाल मेनन हांचे हस्तुकीं भोवमान केलो. निर्मला उल्हास परब, सरोजादेवी म्हाळशेकार तशेंच गोंय विद्यापिठाचे पालवी ग्रंथपाल डॉ विक्रांत मालवणकार हांचो शाल, श्रीफळ आनी यादस्तीक दिवंन भोवमान केलो. पीएचडी मेळोवपी डॉ रोनाल्डो डिक्रुज आनी गोंय विद्यापिठाचो डॉ संदेश देसया हांचोय भोवमान केलो.
मॉडर्न लायब्रेरीज रिसेंट ट्रेंड्स चेलेंजीस अण्ड ओपुर्च्युनिटी ह्या पुस्तकाचें प्रकाशन केलें. संदेश देसाय, बाळा मांद्रेकार, केशव धुरी आनी वळवयकार हांणी तांचें संपादन केलां. परिशदेंत 33 ग्रंथपालांनी आपले प्रबंध सादरकेले. गोंय, महाराष्ट्र, कर्नाटक आनी केरळांतले मेळून 150 ग्रंथपालांनी आनी विद्यार्थ्यांनी हे परिशदेंत वांटो घेतिल्लो. नोव्हेल्टी वळवयकारान सूत्रसंचालन केलें. डॉ संदेश देसाय हांणी येवकार दिला आनी बाळा मांद्रेकारान सगल्यांचे उपकार मानले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
