भांगरभूंय | प्रतिनिधी
गोवा फारवर्ड, काँग्रेस, राष्ट्रवादी काँग्रेसीचें राज्यपालांक निवेदन
पणजी : नगराध्यक्ष वेंचणुकेंत हात वयर करून मतदान करपा खातीर गोंय पालिका कायद्यांत केल्ली दुरुस्ती फाटीं घेवची, हे मागणे खातीर गोवा फॉरवर्ड, काँग्रेस तशेंच राष्ट्रवादी काँग्रेसच्या फुडाऱ्यांनी शेनवारा राज्यपालांची भेट घेतली. पालिका कायद्यांत केल्लो बदल चुकीचो आसून ही लोकशायेची हत्या आसा. राज्यपालांनी ही दुरुस्ती फाटीं घेवची, अशी मागणी ह्या फुडाऱ्यांनी केल्या.
गोवा फॉरवर्डाचे अध्यक्ष आमदार विजय सरदेसाय, काँग्रेसचे एल्वीस गोम्स, राष्ट्रवादी काँग्रेसचे जुझे फिलीप डिसोझा आनी हेर वांगडी हाजीर आशिल्ले.
दर खेपे भाजपाक वेंचणुकेंत हारीची जाणीव जाता तेन्ना कायद्यांत बदल करतात. अशें कायदे बदलून वेंचणुको घेवपा परस सरळ नगराध्यक्षाची निवड करची. जैत मेळोवपाक भाजपा सत्तेचो दुरुपयोग करता, असो आरोप विजय हांणी केलो.
हारीक भियेवन भाजपा कायदो बदलताः विजय
भाजपा आपणाक जाय तशे कायदे बदलत आसा. गोवा पालिका कायद्यांत हात वयर करून नगराध्यक्षाची निवड करप हे लोकशाये विरोधांत आसा. मडगांवचे आमदार दिगंबर कामत हे भियेल्यात. मडगांव पालिकेंत ह्या कायद्याचो वापर करपाक हो दुरुस्तीचो हेत आसा. हे विशीं आमी राज्यपालांक निवेदन भेटयलां. राज्यपाल योग्य तो निर्णय घेतले, अशें विजय सरदेसाय हांणी सांगलें.
..नाजाल्यार न्यायालयांत वतलेः काँग्रेस
भाजपाक फक्त हात दिसता. म्हूण हात वयर करून नगराध्यक्ष निवडीचो कायदो केला. हें सरकार कायद्यान न्हय, हुकूमशायेन चलता. दर खेपे सरकारा आड न्यायालयांत वचचें पडटा. हो दुरुस्ती कायदो फाटीं घेतलोना जाल्यार आमी सरकारा आड न्यायालयांत वतले, अशी शिटकावणी काँग्रेसचे एल्वीस गोम्स हांणी दिली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
