भांगरभूंय | प्रतिनिधी
डळमळीत सुरुवात केल्या उपरांत गोंयच्या मदले फळयेंतल्या बॅट्समनांनी समजिकायेची बॅटींग करीत सय्यद मुश्ताक अली टी-20 क्रिकेट सर्तींतले आपले पयले सांखळी मॅचींत त्रिपुरा आड 5 विकेटींनी जैत जोडलें.
सवाई मानसिंग स्टेडियमाचेर आयोजीत केल्ले मॅचींत गोंयान टॉस जिखून पयलीं त्रिपुराक बॅटींग करपाचें आमंत्रण दिलें. मुखेली स्नेहल कवठणकाराचो हो निर्णय ताच्या बॉलरांनी योग्य थारायतना निर्धारीत ओव्हरींनी 8 विकेटी घेवन त्रिपुराचो स्कोर 114चेर आडायलो. त्रिपुरा वतीन शुभम घोषान सगल्यांत चड नाबाद 24 धांवड्यो केल्यो. गोंया वतीन स्पिनर अमित यादवान 3 जाल्यार लक्ष्य गर्गान दोन विकेटी घेतल्यो.
ल्हान मोखीचो फाटलाव करपी गोंयची सुरवात सामकी बाबत जाली. एका वेळार ताणें 20 धांवड्यांचेर म्हत्वाच्यो चार विकेटी वगडायिल्ल्यो. पूण मदले फळयेंतल्या बॅट्समनांनी समजिकायेन बॅटींग करून 11 बॉल आनी 5 विकेटी राखून गोंयाक जैत मेळोवन दिलें.
तुनिष सावकारान 25 बॉलांनी 36 धांवड्यो केल्यो. हातूंत तीन चवके आनी दोन सक्यांचो आस्पाव आशिल्लो. एकनाथ केरकारान नाबाद 34 धांवड्यो केल्यो. जाल्यार दीपराज गांवकारान नाबाद 28 धांवड्यांचें योगदान दिलें.
तुनिषान पांचवे विकेटी खातीर एकनाथ केरकारा वांगडा 51 धांवड्यांची म्हत्वाची भागिदारी केली. उपरांत एकनाथ आनी दीपराज गांवकार हांणी सवे विकेटी खातीर नाबाद 47 धांवड्यांची भागिदारी करून गोंयचें जैत निश्चीत केलें.
धांवतकटो थोडे भितरः त्रिपुरा, 20 ओव्हरींनी 8 बाद 114 धांवड्यो (श्रीदम पॉल 17, रजत डे 17, शुभम घोष नाबाद 24, राणा दत्ता नाबाद 11 धांवड्यो, अमित यादव 3-10, लक्ष्य गर्ग 2-29, फॅलिक्स आलेमांव, सिद्धेश लाड आनी दर्शन मिशाळ दरेकी 1 विकेट) हार आड गोंय, 18.1 ओव्हरींनी 5 बाद 118 धांवड्यो (तुनिष सावकार 36, एकनाथ केरकार नाबाद 34, दीपराज गांवकार नाबाद 28 धांवड्यो, मनिषशंकर मुरासिंग, अभिषेक सरकार, दीपक खत्री आनी शंकर पॉल दरेकी 1 विकेट).
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
