भांगरभूंय | प्रतिनिधी
राज्यांत 3 नोव्हेंबर सावन 42वी राष्ट्रीय एनटीपीसी कनिश्ठ तिरंदाजी करंड सर्तीचें आयोजन केलां. खेळां प्राधिकरणाच्या जोड पालवान हौशी तिरंदाजी संघटनेन सर्तीचें आयोजन केलां.
काल आयोजीत केल्ले पत्रकार परिशदेंत आयोजन समितीचे अध्यक्ष किरण कांदोळकारान ही म्हायती दिली. कांपाला वयल्या खेळां संकुल मैदानांत आयोजीत केल्ले पत्रकार परिशदेंत ते उलयताले.
देशांतले राष्ट्रीय, आंतरराष्ट्रीय पांवड्या वयले 1,100 स्पर्धकांची सर्ती खातीर नांव नोंदणी जाली. 22 ऑक्टोबर मेरेन नोंदणी करपाची निमाणी तारीक आसा. पूण, ही तारीख मुखार वाडोवपाची शक्यताय आसा अशें कांदोळकारान सांगलें.
ही सर्त म्हणल्यार फुडल्या वर्सा राज्यांत जावपी राष्ट्रीय खेळां सर्तीचें अनावरण आशिल्ल्याचें तांणी सांगलें. 2010 आनी 2016त सर्तीचें आयोजन केल्लें, त्या वेळार लेगीत बरो प्रतिसाद लाबिल्लो अशी म्हायती तांणी मुखार दिली.
सर्त राष्ट्रीय दूरदर्शनाच्या खेळां चॅनेलाचेर, फेसबूक, इंस्टाग्राम, व्हॉट्सअॅप ह्या माध्यमांतल्यान पळोवपाक मेळटली. रिकर्व्ह रावंड, कम्पावंड रावंड आनी इंडियन बांबू रावंड ह्या तीन गटांनी जातली.
आयोजन समितींत मुख्यमंत्री डॉ. प्रमोद सावंत, खेळां मंत्री गोविंद गावडे, आमदार राजेश फळदेसाय हांचो आस्पाव आसा.
सुमार 85 लाख रुपया खर्च येवपाची शक्यताय
सर्तीच्या आयोजनाक वट्ट खर्च सुमार 85 लाख रुपया येवपाची शक्यताय आसा. सगल्या स्पर्धकांची रावपाची आनी हेर वेवस्था आयोजका वतीन करतले. हातूंतली कांय रक्कम एनटीपीसी दितले अशी म्हायती ह्या वेळार दिली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
