भांगरभूंय | प्रतिनिधी
नदर दवरपाक समन्वय अधिकाऱ्याची नेमणूक, लोकांनी जतनाय घेवची
भांगरभूंय I प्रतिनिधी
पणजी : गोंयांत लंपी दुयेंस पातळपाची भिरांत निर्माण जाल्या. हाका लागून गोरवा सांबाळ खात्यान उपाय येवजण करपा सयत दुयेंस नियंत्रणांत दवरपा खातीर पावलां उखलपाक सुरवात केल्या. गोंयांत आतां मेरेन 32 गोरवांक लंपी दुयेंसाची लागण जाल्या. तशेंच 22 हजार गोरवांक लंपी प्रतिबंधात्मक वासिनाचो डोस दिला. गोरवा सांबाळ खात्याचे मंत्री निळकंठ हळर्णकार हांणी ही म्हायती दिली.
महाराष्ट्र तशेंच कर्नाटकांत लंंपी दुयेंसाचें प्रमाण वाडत आसा. हाका लागून सरकारान भायल्या राज्यांतल्यान गोंयांत गोरवा हाडपाचेर बंदी घातल्या. गोंयांत लंपी दुयेंसाची 32 गोरवां मेळ्ळी. लंपी दुयेंसाक लागून अजून एकाय गोरवाक मरण येवंक ना. मयें – शिकेरी गोशाळेंतल्या गोरवांक लंपी दुयेंस जाला. तांचेर उपचार सुरू आसात.
लंपी दुयेंसाची लागण जावची न्हय, तशेंच हें दुयेंस सगळ्याक पातळचें न्हय, म्हूण शेतकार तशेंच दुदाचो वेवसाय करपी लोकांनी जतनाय घेवपाची गरज आसा. लंपी दुयेंसाची लागण जाल्ल्याचो दुबाव आयल्यार लागसारच्या गोरवा सांबाळ खात्याक कळोवचे. दोतोर येवन गोरवांची तपासणी करतले. रस्त्याचे कुशीक वा रानांत लंपीची लागण जाल्ल्याचो दुबाव आयलो जाल्यार व्हॉट्सअॅपाचेर फोटे लेगीत धाडपाक हरकत ना. मडगांवच्या एका बैलाचो फोटे व्हॉट्सअॅपाचेर व्हायरल जाला. खात्यान पंगड धाडून त्या बैलाक मयें गोशाळेंत हाडला. लंपीच्या दुबावीत गोरवांक गोशाळेंत स्वतंत्र दवरून उपचार जातात. हाका लागून गोशाळेतलीं हेर गोरवां सुरक्षीत उरतात.
लंपीची लागण जावपाक जायना, म्हूण वासिनीकरण मोहीम अदीक नेटान करपाची गरज आसा. 22 हजार गोरवांक वासीन दिलां. तशेंच राज्य सरकारान केंद्रा कडेन आनीक 22 हजार वासिनांची मागणी केल्या. ही वासिनां अायले उपरांत वासीन दिवप सुरू जातलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
