गोंयांत फाटल्या सात वर्सांत 306 ‘स्टार्टअप’

भांगरभूंय | प्रतिनिधी

2,065 जाणांक मेळ्ळो रोजगार, लोकसभेंत म्हायती

भांगरभूंय प्रतिनिधी
पणजी : फाटल्या सात वर्सांत गोंयांत वट्ट 306 स्टार्टअप’ सुरू जालें. ताचे वरवीं 2,065 जाणांक रोजगार मेळ्ळो, अशी म्हायती केंद्रीय वाणिज्य आनी उद्देग राज्य मंत्री सोमप्रकाश हांणी लोकसभेंत लेखी प्रस्नांच्या जापेंतल्यान दिली.
2016त केंद्र सरकारान ‘स्टार्टअप इंडिया’ ची घोशणा केले उपरांत हे मोहिमे खाला गोंया सयत देशभरांत स्टार्टअप मोहिमेक गती मेळ्ळी. केंद्र सरकाराचे अर्थीक मजतीचो लाव घेवन विवीध राज्यांतल्या तरणाट्यांनी ‘स्टार्टअप’ सुरू केलें. ते प्रमाण गोंयांत फाटल्या सात वर्सांत 306 ‘स्टार्टअप’ सुरू जालें. तातूंतल्यान 2,065 जाणांक रोजगार मेळ्ळोे, अशें मंत्री सोमप्रकाश हांणी लेखी जापेंत नमूद केलां.
गोंयांत 2016त फक्त दोन ‘स्टार्टअप’ सुरू जाल्लें. ते उपरांत 2021 मेरेन हो आंकडो वाडलो. देशभराचो विचार केल्यार 2016 पसून आतां मेरेन देशभरांत 72,993 स्टार्टअप सुरू जालें. ताचे वरवीं 7,67,754 जाणांक रोजगार मेळ्ळो, अशें लेखी जापेंत नमूद केलां.
गोंयांत म्हायती-तंत्रज्ञान खात्या वरवीं स्टार्टअप धोरण चालीक लावन तांणी स्टार्टअप सुरू करपी इत्सूक थळाव्या तरणाट्यांक अर्थीक मजत दिवपाक सुरवात केली. ताका लागून स्टार्टअप सुरू करपी तरणाट्यां मदीं फाटल्या कांय वर्सां पसून वाड जायत आसा.