भांगरभूंय | प्रतिनिधी
मुख्यमंत्रीः पणजे इन्व्हेस्ट गोवा 2024 चें उक्तावण
भांगरभूंय । प्रतिनिधी
पणजीः गोंयांत आनी केंद्रांत भाजपाचें डबल इंजीन सरकार आसा. गुंतवणूकदारांक उर्बा दीत दोनूय सरकारांनी विवीध येवजण्यो हाडल्यात. ताका लागून गोंयांत गुंतवणूक करचे खातीर होच योग्य वेळ आशिल्ल्याचें मत मुख्यमंत्री डॉ. प्रमोद सावंत हांणी उक्तायलें.
सोमारा पणजे जाल्ल्या इन्व्हेस्ट गोवा 2024 च्या उक्तावण सुवाळ्यांत मुख्यमंत्री उलयताले. ह्या वेळार माचयेर मंत्री मॉवीन गुदिन्हो, आदले केंद्रीय मंत्री सुरेश प्रभू, उद्देगीक विकास म्हामंडळाचे अध्यक्ष आमदार आलेक्स रेजिनाल्ड, जीसीसीआयचे अध्यक्ष श्रीनिवास धेंपो आनी हेर अधिकारी हाजीर आशिल्ले.
मुख्यमंत्र्यांनी सांगलें, गोंयांत अर्थीक विकास आनी उद्देग मळा वयल्यो संदी वाडोवचे खातीर राज्य सरकार यत्न करता. आमी लाल फितीचो कारभार उणो करचे खातीर तशेंच वेवसायांत सोंपेपण हाडचे खातीर विवीध यत्न केल्यात. उद्देग वेवसाया खातीर गरजेचे आशिल्ले बरे रस्ते, विमानतळ, डिजिटल कनेक्टिव्हीटी हाडल्या. रोजगारा खातीर गरजेची कुशळटाय विकसीत करचे खातीर आमी विवीध नामांकीत संस्थां वांगडा कबलाती केल्यात. ह्या सगळ्या गजालींचो उद्देगांक निश्चीत फायदो जातलो.
गोंय म्हणल्यार फक्त पर्यटन थळ न्हय
गुंतवणूकदारांनी गोंया कडेन फक्त पर्यटन थळ म्हूण पळोवचें न्हय. तांणी गोंया कडेन वयर सरपी अर्थीक शक्त म्हूण पळोवचें. गुंतवणूकदारांनी गोंयांत येवचें आनी स्वता वांगडा राज्याची लेगीत उदरगत करची. तुमच्या येसांतूच आमचें येस आसा. गुंतवणूकदारांक आमी येवकार दितात. तांकां कसलेय तरेची मजत करपाक आमी तयार आसात. इन्व्हेस्ट गोवा हो फक्त एक इव्हेंट न्हय जाल्यार गुंतवणूकदारां खातीर ठोस आस्वासन आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
