भांगरभूंय | प्रतिनिधी
भांगरभूंय । प्रतिनिधी
पणजीः राजस्थानांतल्या उदयपूर हांगा कन्हैयालाल ह्या हिंदूच्या ताचो टेलरींगाच्या दुकानांत घुसून दोन कट्टरतावादी आतंकवाद्यांनी हत्या केली. देशाचें सार्वभोमत्व, संविधान आनी लोकशायेचेर केल्लें हें आक्रमण आसा. असल्यो घडणुको गोंयांत जावच्यो न्हय हे खातीर राज्य सरकारान सादूर रावचें अशें हिंदू रक्षा म्हाआघाडीचो निमंत्रक प्रा. सुभाष वेलिंगकार हांणी एके पत्रकार परिशदेंत केली.
कन्हैयालाल हाची हत्या करून आतंकवाद्यांनी ताचो व्हिडिओ तयार करून हासंत हत्येची कबुली दिली. पंतप्रधान नरेंद्र मोदी तशेंच नुपूर शर्मा हिका धमकी दिली. महाराष्ट्रांत अमरावती हांगा एका मेडिकल दुकानाचो धनी उमेश कोल्हे हाचीच आतंकवाद्यांनी हत्या केल्ली. हिंदू रक्षा म्हाआघाडीन ताचो निषेध केला. सिरिय, अफगाणिस्तानांत इस्लामीक स्टेट कडल्यान जातात तसल्यो भिरांकूळ जिहादी घ़डणुको आतां भारतांत जावपाक लागल्यात. गोंयांत कटट्रपंथी संघटनांचो प्रभाव वाडपाक लागला. दर वर्सा 6 डिसेंबराक बाबरी मिशिदीचे पोस्टर लावून भावना भडकावपाचो यत्न करतात. विदेशी पर्यटकांक लागून गोंयांक आतंकवादी लक्ष्य करपाक शकतात. गोंयांत रोजगारा खातीर येवपी लोकां मदीं बांगलादेशी आनी रोहिंग्यांचो आसपाव आसपाक शकता. तातूंतल्यान गोंयांत कट्टरपंथींयाचो प्रवेश जावपाक शकता अशें सुभाष वेलिंगकार हांणी म्हणलां.
उदयपूर आनी अमरावती हांगच्या आतंकवाद्यांक अटक केली म्हणून व्हो विशय सोपचो ना. नुपूर शर्मा हिका धमकी दिवपी वक्तव्यां देशांत जातात. मुसलमान तरणाट्यांचे ब्रेनवॉश करपी मौलवी आनी कट्टरावादी मुसलमान संघटना ताका जापसालदार आसात. आतंकवादाची सुरवात मदरशांचे मानसिकतेंतल्यान जाता अशें केरळाचे राज्यपाल मोहम्मद आरिफ हांणी सांगलां. केंद्र सरकाराक हिंदूचे हत्ये फाटल्यान कसलें षड्यंत्र आहे सोदून काडून ताकां खंयच्यान पशये मेळटात हे सोदून काडपाक गोंय सरकारान सांगचें अशें वेलिंगकार हांणी मागलां.
गोंयांतल्या घुसखोरांची तशेंच कट्टरपंथी दुबावितांची म्हायती काडपा खातीर दरेका पुलीस स्टेशनांत एका विभागीच स्थापणूक करची अशी मागणी हिंदू रक्ष म्हाआघाडेन केल्या. हिंदू जनजागृती समितीचे राष्ट्रीय म्हणयारे रमेश शिंदे, म्हाआघाडीचो जोड निमंत्रक संदीप पाळणी, गोमंतक मंदिर म्हासंघाचो अध्यक्ष चंद्रकांत (भाई) पंडित, राष्ट्रीय बजरंग दलाचे गोंयचे अध्यक्ष नितीन फळदेसाय, सुरेश डिचोलकार, गणेश गावडे आनी शुभा सावंत पत्रकार परिशदेक हाजीर आशिल्ली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
