भांगरभूंय | प्रतिनिधी
भांगरभूंय । प्रतिनिधी
म्हापशें: गोंयांतलीं व्हड व्हड ड्रग्स वेव्हारांचीं रॅकेटां नश्ट करप, हीच आमची मुखेल मोख आसा, अशी म्हायती नार्कोटीक कंट्रोल ब्यूरोचे (एनसीबी) मुंबय क्षेत्रीय संचालक अमित घावटे हांणी दिली. मुंबय क्षेत्रीय विभागाचा ताबो घेतले उपरांत घावटे हांणी गोंय कार्यालयाक भेट दिली. ह्या वेळार ते प्रतिनिधी कडेन उलयताले.
ड्रग्साचें रॅकेट उद्धस्त करचे खातीर आमकां गोंयकारांच्या आदाराची आस्त आसा. लोकांक ड्रग्सा विशीं कसलीय खबर आसल्यार तांणी ती आमचे कडेन संपर्क करून दिवची. ते खातीर नागरिकांनी [email protected] हे ईमेलीचेर वा 08322412030 ह्या फोन नंबराचेर संपर्क करचो, असो उलो घावटे हांणी मारला. एनसीबीचे विभागीय संचालक घावटे हे 2008 चे भारतीय महसूल सेवेचे (आयआरएस) अधिकारी आसात. एनसीबीच्या बंगळुरू आनी चेन्नय विभागाचो तांणी पदभार सांबाळिल्लो. बंगळुरूंत आसतना तांणी ड्रग्साची आंतरराष्ट्रीय व्हड व्हड रॅकेटा नश्ट केल्यात.
गोंयाक पूर्ण क्षेत्रीय विभागाचो दर्जो दिवपाचो यत्न
गोंय हें आंतरराष्ट्रीय पर्यटन स्थळ आसा. ताका लागून हांगा व्हड प्रमाणांत घुंवळे वखदां वेव्हार सुरू आसा. सध्या एनसीबीच्या मुंबय क्षेत्रीय विभागांत गोंयचो आसपाव उपक्षेत्रीय विभागांत आसा. गोंयाक पूर्ण क्षेत्रीय विभागाचो दर्जो दिवपाचो यत्न चालू आसा. केंद्रीय गृह खात्यान हे विशींची प्रक्रिया सुरू केल्या, अशी म्हायती मेळ्ळ्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
