गोंयचो बायलां पंगड हारलो

भांगरभूंय | प्रतिनिधी

बायलांचे 19 वर्सां पिराये सकयले टी-20 यूथ क्रिकेट सर्तींत गोंयाक आपले पयले मॅचींत 7 विकेटींनी हार घेवची पडली. हैदराबादाच्या जिमखाना मैदानाचेर जाल्ले मॅचींत ताका मेघालया पंगडान हारयलो.
टॉस जिखून पयलीं बॅटींग करपाचो निर्णय घेवपी गोंयान निर्धारीत 20 ओव्हरींनी 2 विकेटी वगडावन फक्त 85 धांवड्यो केल्यो. हर्षिता यादवान सगल्यांत चड नाबाद 41 धांवड्यो केल्यो. तिणें 57 बॉलांक तोंड दितना स चवके मारले.
मेघालयान 18.2 ओव्हरींनी 3 विकेटी वगडावन 86 धांवड्यो करून जैत जोडलें. एस अंकितान नाबाद 46 धांवड्यो केल्यो. तिणें 46 बॉलांक तोंड दितना पांच चवके मारले. गोंय आपली फुडली मॅच कर्नाचक पंगडा आड खेळटलो.
थोडे भितर धांवतकटोः गोंय, 20 ओव्हरींनी 2 बाद 85 धांवड्यो (प्रेशा नायक 17, हर्षिता यादव नाबाद 41, तानिया वार 1, पलक आरोंदेकार नाबाद 14 धांवड्यो, श्रुती 2-17) हार आड मेघालय, 18.2 ओव्हरींनी 3 बाद 86 धांवड्यो ( एम. लिंगडोह 25, एस अंकिता नाबाद 46 धांवड्यो, तानिया पवार 1-20, पुजा निशाद 1-5).