भांगरभूंय | प्रतिनिधी
अहमदाबाद, खबरां संस्था: फोंडेंचे पूत आनी प्रतिभावान दिग्दर्शक आदित्य सुहास जांभळे हांणी ‘आर्टिकल 370’ ह्या हिंदी चित्रपटा खातीर प्रतिश्ठीत फिल्मफेअरचो ‘उत्कृष्ट दिग्दर्शक (पदार्पण)’ पुरस्कार मेळयला. आदित्य जांभळे हे फिल्मफेअर पुरस्कार जिखपी पयलेच गोंयकार थारले.
अहमदाबादांत 70 व्या फिल्मफेअर पुरस्कार सुवाळ्याचें आयोजन केल्लें. हे कार्यावळी वेळार तांणी हो पुरस्कार अभिनेतो अक्षय कुमार हांचे कडल्यान स्विकारलो.
आदित्य जांभळे हांचे विशीं
आदित्य हांणी इलेक्ट्रॉनिक्स इंजिनीअरिंगांत बीई पुराय केले उपरांत तांणी गोंयच्या नाट्य आनी चित्रपट मळार आपली सुवात निर्माण केली. तांकां दोन फावटीं दिग्दर्शक, लेखक आनी अभिनेते म्हणू राष्ट्रीय पुरस्कार फावो जाल्यात. 2016 वर्सा तांणी दिग्दर्शित केल्लें ‘आबा, ऐकताय ना?’ या लघुपटा खातीर तांकां सर्वोत्कृष्ट दिग्दर्शक म्हणून राष्ट्रीय पुरस्कार मेळिल्लो. तांचो दुसरो लघुपट ‘खरवस’ 2018 वर्सा सर्वोत्कृष्ट लघुपट म्हणून राष्ट्रीय पुरस्कार जैतिवंत थारलो. ‘इफ्फी2018’त ‘खरवस’ सिनेमाक इंडियन पॅनोरमा विभागांत ‘ओपनिंग फिल्म’ चो मान मेळिल्लो. तांच्या ‘अमृतसर जंक्शन’ ह्या तिसर्या शॉर्ट फिल्माक लागून तांकां ‘उरी’ चित्रपटाच्या निर्मात्यां वांगडा काम करपाची संद मेळ्ळी, जाची परिणती ‘आर्टिकल 370’ चित्रपटांत जाली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
