भांगरभूंय | प्रतिनिधी
भांगरभूंय प्रतिनिधी
काणकोणः फाटल्या पांच वर्सांत काणकोणात उदरगत जावपाक शकली ना. फुडल्या 10 वर्सांत आमी रमेश तवडकार हांच्या फाटल्यान खंबीरपणा उबे रावून काणकोण मतदारसंगाची सर्वांगी उदरगत करून घेततले अशें काणकोण भाजपा मंडल पदाधिकाऱ्यांनी एके पत्रकार परिशदेत सांगलें. सभापतीचें काम फकत विधानसभेचें कामकाज चलोवप इतले मेरेन मर्यादीत ना. सभापती आपलो अधिकार वापरून ताच्या मतदारसंघाची उदरगत करपाक शकता, अशें दक्षीण गोंय भाजपा उपाध्यक्ष महेश नायक हांणी ह्या वेळार सांगलें.
भाजपा मंडल सरचिटणीस विसांत गांवकार, सचीव प्रभाकर गांवकार, सिदार्थ देसाय हांणी श्रीस्थळ हांगच्या सरकारी विसोव घरांत शेनवारा पत्रकार परिशद आयोजीत करून काणकोणचे उदरगती संबंदी मत प्रदर्शन केलें. सभापती तवडकार हांणी गुळे तें बाळ्ळी हायवेच्या हॉटमिक्स डांबरीकरणा खातीर 27.70 कोटी रुपया मंजूर करून घेतल्यात. हें काम आयतार सावन सुरू जातलें अशे नायक हांणी सांगलें. तवडकार हांणी केल्ल्या यत्नाक लागू 23 किलोमीटर लांब रस्त्याच्या डांबरीकरण कामा खातीर 15 दिसांत निधीक मंजुरी दिवपाचे काम जालें अशें विशांत गांवकार हांणी सांगलें. फाटल्या पांच वर्सांत काणकोणची चडशी उदरगत जावपाक शकली ना असो दावो काणकोण पालिका मंडळाचो आदले नगराध्यक्ष किशोर शेट हांणी केलो. फुडल्या धा वर्सांत काणकोणचो भाजपा परिवार तवडकार हांच्या फाटल्यान रावतलो अशें तांणी जाहीर केलें. लोलयें-पोळें पंचायत वाठारांत उदरगती खातीर 4.15 कोटी, पैंगीण पंचायती खातीर 2.81 कोटी रुपया तवडकार हांणी मंजूर करून घेतल्यात. खोतीगांवांत मोबायल टॉवर उबारपाचें काम पुराय जातलें अशी म्हायती तांणे दिली.
पत्रकार परिशदेक पंच वांगडी दत्ता गांवकार, नगरसेविका सारा देसाय, अमिता पागी, हेमंत नायक गांवकार, नार्सिस्को फर्नांडीस आनी काणकोणचो उपनगराध्यक्ष लक्ष्मण पागी हाजीर आशिल्लो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
