भांगरभूंय | प्रतिनिधी
काँग्रेस पक्षाचें राज्यपालांक निवेदन
पणजीः गोंय नगरपालिका कायदो 1968 त दुरुस्ती करून हात वयर उखलून मतदान करपाचो गोंय सरकाराचो अध्यादेश म्हणल्यार लोकशायेची हत्या. हाका मंजुरी दिनासतना गुप्त मतदानाचो अधिकार राखून दवरचो, अशा आशयाचें निवेदन काँग्रेस पक्षा वतीन राज्यपाल पी. एस. श्रीधरन पिल्लई हांकां दिलां.
प्रदेशाध्यक्ष अमीत पाटकार हांणी ही म्हायती दिली. आर्टिकल 21.3 प्रमाण प्रधानमंत्री वेंचणूक ते नगराध्यक्षाचे निवडी मेरेन सगल्यांक गुप्त मतदानाचो अधिकार आशिल्ल्याचें सगल्यांक खबर आसा. तो मानवी हक्क आसा. पंचायत पांवड्या वयले वेंचणुके खातीर लेगीत हो नेम लागू आसा, अशें निवेदनांत म्हणलां.
सर्वोच्च न्यायालयान लक्ष्मी सिंग हांच्या प्रकरणांत पारदर्शक वेंचणुके खातीर गुप्तताय राखप गरजेचें आसा अशें सांगलां. तेच प्रमाण मुंबय उच्च न्यायालयान मारुती पाटील हांच्या प्रकरणांत लेगीत होच निर्णय दिला, अशें निवेदनांत म्हणलां.
गोंय सरकार लोकशाय काबार करपाचो यत्न करता. तांच्या ह्या अध्यादेशाक मंजुरी दिवची न्हय, अशी विनवणी निवेदनांतल्यान केल्या.
आपल्या समाज माध्यमाचेर पाटकार हांणी निवेदनाचे फोटो पोस्ट केल्यात. केरळांतल्यान राज्यपालान ह्या अध्यादेशाचेर सय कशी केली, हे विशींय अजाप दिसता, अशें तांणी म्हणलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
