भांगरभूंय | प्रतिनिधी
गुजरात टायटन्स इंडीयन प्रिमीयर लिगेच्या (आयपीएल) अंदूंच्या हंगामांत सुवात मेळोवपी पयलो पंगड थारलो. काल हांगाच्या महाराष्ट्र क्रिकेट असोसिएशनाच्या मैदानाचेर खेळयिल्ले 57वे मॅचींत ताणें लखनौ सुपर जायण्ट्साक 62 धांवड्यांनी हारयलो.
टॉस जिखून पयलीं बॅटींग करपाचो निर्णय घेवपी गुजरात टायटन्सान निर्धारीत 20 ओव्हरींनी 4 विकेटी वगडावन 144 धांवड्यो केल्यो. शुभमन गिलान सगल्यांत चड 63 धांवड्यांचें योगदान दिलें. धांवड्यांचो फाटलाव करपी लखनौ सुपर जायण्ट्साचो डाव इस्पिकाच्या पत्त्यां भशेन कोसळ्ळो. ताचो डाव 13.5 ओव्हरींनी फक्त 82 धांवड्यांचेर सोंपलो. लखनौ वतीन दीपक हुड्डान सगल्यांत चड 27 धांवड्यो केल्यो. गुजराता वतीन लेग स्पिनर राशिद खानान चार विकेटी घेतल्यो. यश दयाल आनी आर साई किशोर हांणी दरेकी 2 विकेटी घेतल्यो.
फक्त 145 धांवड्यांचो फाटलाव करपी लखनौची सुरवात सामकी बाबत जाली. 24 धांवड्यां मेरेन पावता पावता क्विंटन डी कॉक आनी मुखेली लोकेश राहुल तंबूंत परत गेल्ले. एका फाटल्यान एक विकेट पडिल्ल्यान तांकां शंबराचो आंकडो लेगीत हुपपाक जमलो ना.
गुजराताचो लेग स्पिनर राशिद खानान काल जबरदस्त प्रदर्शन केलें. ताणें 3.5 ओव्हरींनी फक्त 24 धांवड्यो दिवन चार विकेटी घेतल्यो.
ते आदीं टॉस जिखून पयलीं बॅटींग करपी गुजरात पंगडाची लेगीत सुरवात बरी जाली ना. वृद्धिमान साहा 11 बॉलांनी 5 धांवड्यो करून तंबूंत परतलो. आवेश खानान मॅथ्यू वेडाक (10) बाद केलो. मुखेली हार्दिक पांड्या (11) हाका लेगीत आवेश खानान बाद केलो. ताका लागून गुजराताची स्थिती 3 बाद 51 अशी जाली.
ते उपरांत डावाची सुरवात करपाक आयिल्ल्या शुभमन गिलान चिवट खेळी करीत डॅव्हीड मिलरा वांगडा मेळून अर्द शेंकड्याची भागिदारी केली. पूण, 24 बॉलांनी 26 धांवड्यो करपी मिलराक जेसन होल्डरान बाद केलो.
मजगतीं, अर्द शेंकडो पुर्ण करपी शुभमन गिलान अखेर मेरेन बॅटींग करतना नाबाद 63 धांवड्यो केल्यो. राहुल तेवतियान अखेरचे ओव्हरींत होल्डराक तीन चवके मारून गुजराताक 144 धांवड्यां मेरेन व्हेलो. तेवतियान 16 बॉलांनी 22 धांवड्यो केल्यो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
