भांगरभूंय | प्रतिनिधी
म्हापशें: गिरीच्या सर्व्हीस रस्त्याची दुरुस्ती करतना जमनी पोंदच्यान गेल्ली उदकाची पायपलायन परतून फुटली. ताका लागून आयताराय साळगांव, म्हापशें आनी कळंगूट मतदारसंघां सयत हणजूणें आनी म्हापशें वाठारांत उदका पुरवण जावंक ना. दोन दीस नळाक उदक येवंक नाशिल्ल्यान लोकांची धांदल जाली.
शेनवारां सकाळीं हीच पायपलायन फुटिल्ली. ताका लागून सर्व्हीस रस्तो नेमिल्लो आनी रस्त्याचेर फोंडकूल पडिल्लें. उदका पुरवण विभागान झुजा पांवड्यार दुरुस्तीकाम हातांत घेवन शेनवारां रातीं उसरां मेरेन ती दुरुस्त केल्ली.
पायपलायन फुटिल्ल्यान अर्दो रस्तो नेमिल्लो आनी दुरुस्ती वेळार खणिल्ल्या फोंडकुलाचें दुरुस्तीकाम आयतारा सकाळीं भौशीक बांदकाम खात्याच्या राष्ट्रीय म्हामार्ग प्राधिकरणान हातांत घेतिल्लें. हें फोंडकूल खडी, माती घालून पुरयिल्लें. तशेंच रस्त्याचें रोड रोलराच्या आदारान सपाटीकरण करपाचें काम हातांत घेतिल्लें. हे काम करतना पायपलायनीक धपको बसलो आनी दनपारां थंयच पायपलायन परतून फुटली.
दनपारां 3 वरांच्या सुमाराक ही गजाल लक्षंत येताच उदका पुरवण विभागाच्या अधिकाऱ्यांक राष्ट्रीय म्हामार्ग प्राधिकरणाच्या अधिकाऱ्यांनी म्हायती दिली. म्हायती मेळटाच उदका पुरवण विभागाचे कार्यकारी अभियंते शंभू मालवणकार आनी सहाय्यक अभियंते महेश केनावडेकार हांणी घडणुकेचे सुवातेचेर धांव मारली आनी पायपलायन फुटिल्ले सुवातेचेर जेसीबीच्या आदारान रस्तो खणपाचें काम हातांत घेतलें.
दुरुस्त केल्ले पायपलायनी वरवीं उदक सोडिल्लें, पूण ही पायपलायन फुटिल्ल्यान परतून हजारांनी लिटर उदकाची नासाडी जाली. पायपलायन फुटिल्ल्यान उदका पुरवण ताकतिकेन बंद केली.
आयतारा मध्यानरातीर पायपलायनीची दुरुस्ती केल्या, पूण अजून तीन चार दीस मर्यादीत उदका पुरवण करतले, अशी म्हायती अधिकाऱ्यांनी दिल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
