भांगरभूंय | प्रतिनिधी
आयज आमी जेन्ना शारांनी वा गांवांनी वतात तेन्ना आमका ल्हान- व्हड गाडे दिश्टी पडटात. कोण चणें, भिकणां विकता तर कोण पिपिरमिटां, चिप्स. थोडे गोड, दाळ, साकर, थंड पेयां विकतना दिसतात. देवळा लागसारच्या गाड्यांनी लोक उजवाती, फुलां विकत घेतात. इस्कोलाक वचपी भुरगीं बटाटवडे, थंड पेय, सामोसा घेवन ह्या गाड्यांक गिरायक घालतात. कांय गाड्यांनी मटको घेतात. तर कांय गाड्यांनी सिगारेटी, गुटखा लिपचोरयां विकतात. सिगरेट ओडपी लोकांची ह्या गाड्यां कडेन गर्दी आसता. थोड्या गाड्यांचेर लोक सामान घेवपाक येनात. तर मटक्याचो नंबर लावपाक येतात. मटको वयल्यान बंद आसा, पूण भितरल्यान तो चालू आसा. ह्या गाड्यांक मटक्याचे गाडे म्हणटात.
कांय गाड्यांनी भायर दिसाळीं दवरतात. तीं वाचपाक आयिल्ले लोक मागीर त्या गाडेकारांक गिरायक घालतात. हे गाडे लोकांक वाचनाची गोडी लायतात ही बरी गजाल. कांय गांवांनी बेकार लोक आसतात. तातूंतले थोडे गुन्यांव करून आपली जीण जगतात. कांय गाड्यांक तर ‘गुन्यांवाचो गाडो’ अशें नांव पडलां. थंय गुन्यांवकार लोक येतात. ल्हवूच लोकांल्या भाटां- बेसांतले नाल्ल, आंबे, सुपारी कशी चोरप हें उलयतात. जांकां खबर आसा ते लोक अश्या गुन्यांवांच्या गाड्या लागसार पसून वचनात. गुन्यांवांच्या गाड्या लागसार वचपी लोक दुसऱ्यांच्या कुस्तार आपलें जेवण शिजयतात, हे कळून येता.
भाटकार गाडी घेवन भायर सरलो काय असले लोक लाकडां चोरतात. लोकांले जागे आपले म्हूण सांगतात. कांय लोकांनी फटीचीं कागदां दाखोवन सरकारी कामां मेळयल्यांत. पुलीस आपले परीन नियंत्रण दवरतात, पूण गांवांतलो गुन्यांवाचो गाडो नेटान चलता. कांय गाड्यांनी फुकेसवाय सामान मेळटा. तें खंयच्यान हाडटात, तें आनी विचारूंक नाका. जायते बेकार लोक ह्या गाड्यांच्या बाकांचेर बशिल्ले आसतात. सरकारान सगल्या गाड्यांचेर बारीकसाणेन लक्ष दवरल्यार समाजाक बऱ्याक पडटलें.
अजय जल्मी
7391996359
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
