भांगरभूंय | प्रतिनिधी
भांगरभूंय । प्रतिनिधी
म्हापशेंः गाडी कुशीक काडपा वयल्यान जाल्ल्या वादांतल्यान एकतानगर- म्हापश्यांत चाकू हल्लो करपाचो प्रकार जालो. तातूंत परशुराम चव्हाण हो गंभीर जखमी जालो. जीएमसींत ताचेर उपचार चल्ल्यात. म्हापशें पुलिसांन बाबू ऊर्फ प्रदीप चौगुले (फॅर आल्त, म्हापशें) हाचे आड खूनी हल्लो केल्ल्याचो गुन्यांव नोंद केला.
फाटल्या आयतारा रातीं 8.45च्या सुमाराक प्रकाश जनरल स्टोरा लागी ही घडणूक जाली. परशुराम हाचो पुतणो सुनील चव्हाण हाणे पुलीस कागाळ केली. परशुराम चव्हाण हाचे चारचाकी गाडे सामकार प्रदीप चौगुलेन आपली दुचाकी पार्क केल्ली. ताणे ती काडपाक सांगिल्ल्यान ताचे मदीं वाद जालो. परशुरामान दुचाकी काडपाचो यत्न केलो तेन्ना ताच्या पोटांत आनी फाटीर चाकू तोपून प्रदीप पळ्ळो.
जखमी परशुरामान ताच्या घरच्यानी म्हापशेंच्या जिल्हो हॉस्पिटलांत दाखल केलें. उपरांत ताका जीएमसीत व्हेलें. ताची भलायकी हुस्क्याची आसा. पुलीस प्रदीप चौगुले हाचो सोद घेतात. पुलीस उपनिरीक्षक आशिष परब तपास करता.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
