भांगरभूंय | प्रतिनिधी
भांगरभूंय प्रतिनिधी
सावयवेरेंः गांवगिऱ्या वाठारांतल्या प्रतिभा आशिल्ल्या क्रिकेट खेळपी भुरग्यांक वेचून काडून तांकां नामणेच्या क्रिकेट कोचां कडल्यान प्रशिक्षण दिवपा खातीत खेळां अकादमी स्थापन करपाचो आपलो यत्न आसा अशें राज्याचे खेळां मंत्री गोविंद गावडे हांणी जाहीर केलां. सावयवेरेंच्या मदनंत क्रिकेट क्लबान गोंय टॅनीस बॉल क्रिकेट असोसिएशन आनी गोंय खेळां प्राधिकरणाच्या पालवान आयोजित केल्ल्या टॅनीस बॉल प्रशिक्षण शिबिराच्या समारोपाचे कार्यावळींत मुखेल सोयरे ह्या नात्यान ते उलयताले.
गोंयच्या खेळा मळाक वेगळें स्वरून दिवपा खातीर खेळां मंत्री ह्या नात्यान आपूण यत्न करतलो. खंयच्याय खेळांत शिस्त, संयम, परिश्रम आनी सराव करप सामकें गरजेचें आसता. खेळगड्यांनी आपलें ध्येय सामकार दवोरून ते खातीर यत्न केल्यार येश मेळपाक शकता. पालकांनी आपल्या भुरग्यां मदीं आशिल्ल्या खेळां गुणाक वाव दिवन तांकां उर्बां दिवपाक जाय अशें तांणी सांगलें.
गांवगिऱ्या वाठारांतल्या क्रिकेट खेळपी भुरग्यां खातीर गोंय टॅनीस बॉल क्रिकेट असोसिएशन आनी गोंय खेळां प्राधिकरणा वतीन पुराय गोंयांत गिमाळीं क्रिकेट शिबिरां आयोजीत करता. ताचोच एक वांटो म्हणून मदनंत क्रिकेट क्लबान सावयवेरें वाठारांत 16 वर्सां पिराये सकयल्या भुरग्यां खातीर हें शिबीर आयोजीत केल्ले. तातूंत 82 भुरग्यांनी वांटो घेतिल्लो.
समारोपाचे कार्यावळीक सावयवेरें- वाघुर्मेचे सरपंच सत्यावाल शिलकार, पंच भूपाल नायक, अजीत नायक, प्रशिक्षक हरिश पार्सेकार, अजिंक्य नायक, नीलेश नायक, क्लबाचो अध्यक्ष बाबुराव शेट्ये, हेमंत कासार हाजीर आशिल्ले. गोविंद गावडे हांचे हस्तुकीं शिबिरांत वांटो घेतिल्ल्याक प्रमाणपत्रां भेटयलीं. उत्कृश्ठ आप वावुरपी म्हणून लक्ष्मीकांत वेरेकार हांका यादस्तीक भेटयलें. सूत्रनिवेदन करून विठ्ठल नायक हांणी उपकार मानले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
