भांगरभूंय | प्रतिनिधी
भांगरभूंय । प्रतिनिधी
पणजीः गोंयांत शाडू मातयेच्यो गणपतीच्यो मुर्ती करपी परंपरीक कलाकारांचो वेवसाय कावलाक आयला. गोंयांत हस्तकला म्हामंडला कडेन वट्ट 570 परंपरीक मुर्तीकारांची नोंद आसा. फाटल्या 10 वर्सां सावन हस्तकला म्हामंडळा वतीन तांकां फक्त 100 रुपया दरेके गणपतीचे मुर्ती फाटल्यान दितात. म्हामंडळान उण्यांत उणे 500 रुपया तरी अनुदान दिवचें अशी मागणी गोंयांतल्या परंपरीक गणपतीच्यो मुर्ती करप्यांनी केल्या.
गोंयांतल्या कितल्याश्याच परंपरीक गणपतीच्यो मुर्ती करप्यांनी आपलो वेवसाय बंद केला. सध्या शाडू मातीचें मोल वाडलां. एक ट्रक मातयेंचें मोल 20 हजार रुपया आसा. कामगारांचो दिसवडो एका हजारा वयर आसा. रंग म्हारग जाला. ताका लागून मुर्तीकारांक गणपतीच्यो मुर्ती परवडना. गणपतीचे मुर्तीचें मोल चड दवरलें जाल्यार लोक घेनात. ताका लागून हो वेवसाय तिगोवन दवरप कठीण जालां. सरकाराक जर हो परंपरीक वेवसाय तिगोवन दवरपाचो आसत जाल्यार ताणें अनुदानांत वाड करपाची गरज आसा, अशें गणपतीची मूर्त करपी अमर शेट हांणी सांगलें.
गोंया भायल्या मुर्तींक लागून वेवसायाक फटको
गोंयांत प्लास्टर ऑफ पॅरिसाचे (पीओपी) मुर्तींक बंदी आसा अशें म्हणटात, पूण गोंया भायल्यान व्हड प्रमाणाचेर पीओपीच्यो मुर्ती हाडटात. त्यो पळोवपाक खुबूच सुंदर आनी आकर्शक दिसतात. त्या मुर्तींचें वजन लेगीत उणें आसता. ताका लागून लोक परंपरीक मुर्तीकारां कडेन येनात आनी मातयेच्या मुर्तींची मागणी उणी जाता. कांय मुर्तीकार 100 मुर्ती तयार करतात, तातूंतल्यो 50 लेगीत खपनात, ताका लागून खूबश्या परंपरीक मुर्तीकारांनी आपलो वेवसाय बंद केला, अशें मुर्तीकार अमर शेट हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
