भांगरभूंय | प्रतिनिधी
दिवचल: छत्रपती शिवाजी खेळां आनी सांस्कृतीक मंडळ – खोलपेवाडी साळ आनी नेहरू युवा केंद्र – पणजी आनी जिल्हो हॉस्पीटल म्हापशें ब्लड बँके वतीन आयतारा रक्तदान शिबिराचें आयोजन केल्लें. हें रक्तदान शिबीर सरकारी मुळावी शाळा, खोलपें हांगच्या सभाघरांत जाली.
ह्या शिबिराक मुखेल सोयरे म्हणून नेहरू युवा केंद्राचे संचालक कालिदास घाटवळ आनी डॉक्टर कळंगुटकार, शिक्षिका मार्सेलीना डिसोझा, नितीन नायक, हर्षा परब, रामदास वरक, विजय सावळ, संतोष झोरे, मंदार पाटील आनी हेर मानेस्त हाजीर आशिल्ले.
ह्या रक्तदान शिबिरांत 30 परस चड जाणांनी रक्तदान केलें.
शिवाजी मंडळ समाजांत तोखणाय करपा सारकें काम करता. ताका लागून समाज बदलत आसा आनी समाजाक खासा करून तरणाट्यांक योग्य दिका मेळटा अशें कालिदास घाटवाल हांणी सांगलें.
ह्या वेळार हर्षा परब आनी मार्सेलिना डिसोजा हांचो मानेस्तां हस्तुकीं भोवमान जालो. हे कार्यावळी खाला पुस्तक वाचन कार्यावळी वरवीं पुस्तकाचें अनावरण जालें. शिवाजी मंडळान, दिवचल म्हालांतल्या विवीध माध्यमीक विद्यालयांनी हीं पुस्तकां वाचपा खातीर वाट्टले अशें सांगलें.
वाचना खातीर दरेका विद्यालयाक एक म्हयन्याचो काळ दितले. तशेंच हीं पुस्तकां दरेका विद्यालयाच्या वाचनालयांत दवरतले. चडांत चड एक म्हयनो तीं वाचपा खातीर उपलब्ध करचीं. हे खातीर दरेके शाळेंतल्या शिक्षकांनी ताचें नियोजन करपाक जाय, अशें रामदास वरक हांणी सांगलें.
हीं सगळीं पुस्तकां प्राध्यापक आनी साहित्यीक रामदास केळकार हांणी भेट म्हणून शिवाजी मंडळाक दिल्यां आनी शिवाजी मंडळा वतीन एक वेगळो उपक्रम राबोवपाचें येवजिलां. हे कार्यावळीचें सुत्रसंचालन सायली सावळ हांणी केलें. जाल्यार तन्वी गवस हांणी उपकार मानले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
