भांगरभूंय | प्रतिनिधी
हालींच राष्ट्रकुल सर्त सोंपली. आमच्या पंगडान व्हड येश मेळोवन 61 पदकां जोडलीं. खाशेली गजाल म्हळ्यार हे सर्तीन आमचो क्रिकेट, फुटबॉल पंगड नासलो म्हूण हें येश उमेद वाडोवपी आसा. आमचे तरणाटे क्रिकेट ना जाल्यार गोंयचो राज्य खेळ फुटबॉलाक चड पसंती दितात. ताचीं जायतीं कारणां आमी सांगूं शकतात. हे खेळ लोकप्रीय आसात. खेरीज दुरदर्शनाचेर तांचे जीवें प्रक्षेपणूय जाता. म्हूण ह्या खेळांतले खेळगडे सिनेमातल्या नटां सारके लोकप्रीय आसता. तांचीं नांवां लेगीत तरणाट्यांच्या ओंठार आसतात. क्रिकेट तरी मात्सो कठीण, पूण फुटबॉल कोणूय खेळूं शकता. आता तर दादल्या वांगडा बायलांचो लेगीत पंगड आसता. पूण हो सांघिक खेळ आशिल्ल्यान सगळ्यांक वांगडा घेवन तुमकां सराव करचो पडटा, पूण अभिनव बिंद्रा तुमकां याद आसतलो 2008 सालांत शूटिंगांत ताणें वैयक्तिक भांगरा पदक देशा खातीर हाडलें. सांगपाचो मुद्दो म्हळ्यार तुमकां जर ह्या फांट्यान करियर करचें कशें दिसता तर अशे वैयक्तिक खेळ तुमी वेंचूं शकतात.
अभ्यासा सारके खेळा भितर लेगीत मार्गदर्शन तशेच सराव म्हत्वाचो आसता. क्रिकेट जाल्यार फुटबॉल सारको खेळ सांघिक खेळचो आसता, पूण तुमी एथलेट्स मदले उंच उडी, लांब उडी, भांगरा पदक मेळोवपी नीरज चोप्रा हांचो भालोफेक, तिरंदाजी, हातोडा फेक सारक्या खेळां प्रकारान तुमी मार्गदर्शन घेवन सराव करूं शकता. आतां ऑनलायन लेगीत मार्गदर्शन मेळूं शकता तशेच यु ट्यूबा चेर व्हिडीयो आसात, ताचो लाव घेवं शकतात. खेलो इंडिया नाजाल्यार ऑलिम्पिक पोडियम येवजण म्हळ्यार टॉप्स सारकी येवजण आमच्या देशाक खेळां भीतर क्रांती करू शकता अशी आसा. राष्ट्रकुल सर्तींत 47 जाण खेळगड्यांक ह्या टॉप्सच्या येवजणेचो लाव मेळ्ळा. शाळेंतल्यो कार्यावळी म्हत्वाच्यो आसतात, तश्यो खेळांच्यो सरती लेगीत म्हत्वाच्यो आसतात. शाळेंतलो शारिरिक शिक्षक/ शिक्षिका तुमकां हे खातीर मार्गदर्शन करू शकता.
कोणूय म्हणटलो फाटले सर्तींत आमकां अंदुंचे परस चार- पांच पदकां चड मेळिल्ली ही गजाल खरी, पूण त्या वेळार आशिल्ले कांय खेळा प्रकार अंदूंचे सर्तींत नात. ही गजालुय आमी मतींत दवरपाक जाय. फुटबॉल आनी क्रिकेटीक वचपाक तरणाटे गर्दी करतात, पूण सगल्यांक येश मेळटाच अशें ना. टीव्ही खातीर हे दोनूय खेळ लोकप्रिय जाल्यात हें आमी न्हयकारुं शकनात. फुटबॉल तर आमचो राज्याचो खेळ. हालींच संवसारीक फुटबॉल संघटनेन भारतीय फुटबॉल संघटनेचेर बंदी हाडल्या, त्या जागतिक फुटबॉल संघटनेचे आदले अध्यक्ष सेप ब्लॅटर जेन्ना भारतान आयिल्ले तेन्ना तांणी देशांतली फुटबॉलाची तयारी पळोवन स्लीपिंग जायंट अशें म्हणिल्लें. म्हणल्यार उठलो जाल्यार तो खंयच्या देशाक हारोवपाक शकता, असो. गजाल खरी, पूण तुमकां जर एखाद्या खेळांत वयलो पांवडो मेळोवपाक जाय तर सराव आनी तो लेगीत खडेंगाड आसूंक जाय. कांय जाणांक जल्मा सावनूच कुशळय आसता. पूण, ताका कोचाच्या रूपांत मार्गदर्शन मेळप गरजेचें.
गोंयांत स्पोर्ट्स ऑथॉरिटी ऑफ गोंय तशेंच युवा वेव्हार खेळां खातें आपले परीन जायत्यो सर्ती आयोजित करता. तातूंत वांटेकार जावप हें खेळां भितर करियर करपाक सोदप्यांचें पयलें काम. फुटबॉल, क्रिकेटी भितर सर्त चड आसा जाल्यार तुमी टेबल टेनिस, ज्युडो, बॉक्सिंग, वेट लिफ्टिंग, बुद्धिबळ सारक्या खेळांक आपणावं येता. शाळेंत शिकतना हेर अभ्यास करतना तुमी खेळा प्रकार वेंचू शकतात. सर्तींत यश मेळ्ळें ना तरी खिलाडूवृत्ती, पराभव स्विकारप, एकामेकांचे मजतीन खेळपाची परोपकारी वृत्ती हे सारके गुण तरी आमचे भितर जरूर येतले. तुमचें फिटनेस बरे उरतलें, जें खंयच्याय करियराक गरजेचें, न्हय ती ताची बुन्यादूच. ह्या मळार शिक्षण दिवपी संस्था तशेंच करियराच्यो संदी हांचो आमी फुडले खेपे विचार करूया.
प्रा रामदास केळकार
9822583275
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
