भांगरभूंय | प्रतिनिधी
गोॆय प्लास्टिक मुक्त करपाची जाहीर घोशणा जाल्ली आॅक्टोबर 2000 वर्सा. आयज 22 वर्सां उलगलीं तरी राज्यांतलें प्लास्टिक कांय उणें जावंक ना. तें आनी कोयर सोंपोवपाक पालिका, पंचायती, समाजसेवकांक वावुरचें पडलें. ओलो, सुको कोयर वेगळो करपाची सुविधा, कोयराचेर प्रक्रिया करपाचो प्रकल्प चालू जावनूय तो नश्ट जावंक ना. सगले काले, जात्रा उलगल्यो काय थंय प्लास्टिकाचे पतंग उडटना पळोवंक मेळटात. कावलाचेंय तशेंच. कोणेतरी तें एकठांय करपाक जाय. नाजाल्यार मेळटा थंय कोयर जातलो. लाखांनी रुपयांची उलाढाल जाता, ह्या धंद्यांत. गोंयांतल्या प्रत्येक गांवांत ल्हान, व्हड कावला अड्डे आसात. सर्वसामान्य मनशाक नश्ट करप अशक्य आशिल्ल्या कोयराचो विलो लावपाक हे अड्डे जायच. तांकां कोणाचो विरोधूय नाशिल्लो. पूण, अदीं मदीं तातूंत बेकायदेशीर गजाली जावपाक लागल्यो. चोरयेच्यो वस्तू सांपडपाक लागल्यो. कांय गुन्यांवकारूय सांपडले. अपघात, दुर्घटनां जावंक लागल्यो आनी भोवतेक लोक कावलां अड्ड्याच्या विरोधांत गेले.
28 डिसेंबराक मुशीरवाडो- कोलवाळच्या रिझवान प्लास्टिक इंडस्ट्री ह्या कावलां अड्ड्यांत उजो लागलो. लागसारचे चार अड्डेय लासून गोबर जाले. एकल्याक मरण आयलें. हे दुर्घटनेचे फांटभूंयेर कोलवाळ पंचायतीन गांवांतल्या सगल्या 51 अड्ड्यांक सील मारपाचो थाराव घेतला. पंचायत राज कायद्यातलें कलम 228 खाला हे सगले कावला अड्डे बंद करपाची कारवाय जातली. मात, हें पावल उबारप तितलें सोंपें ना. न्यायालयांत याचिका गेल्यार सगलें थांबोवचें पडटलें. फुडल्या सप्तकांत कारवायेक सुरवात करपाचें पंचायतीन थारायलां. तांचेर गांवकारांचें चेपण आसा. रिव्होल्युशनरी गोवन्स पक्षान उजो लागपाचे घडणुके वयल्यान कोलवाळ पंचायतीचेर खर टिका केल्ली. ह्या कावला अड्ड्यांचे धनी परप्रांतीय आशिल्ल्यान ‘अड्डा हटाव’ मोहिमेक आनीक इल्लो नेट आयला, हें वेगळें सांगपाक नाका. आनीकूय कांय कारणां आसतलींच.
राज्यांतले कांय कावला अड्डे हे बेकायदेशीर कामां खातीर कुप्रसिद्ध आसात. शेणिल्लें गोरूं एकवेळ करमळेच्या तळ्यार मेळचें ना, पूण चोरयेक गेल्ली गाडी हमखास ह्या अड्ड्यांनी मेळटली, अशें म्हणटात. कोणाक गाडयेचे सुटे भाग जाय, बाजारांत ते खंयच मेळनात, जाल्यार अड्ड्याचेर पासय मारपाची. थंय ते मेळटात. सेकंड हॅण्ड सुटे भाग जाय जाल्यार दोळे धांपून हांगा येवपाचें खंय. ह्या अड्ड्यांचेर काम करपी कामगार रातच्या वेळार बोवाळ करतात, अश्यो कागाळी लागीं रावपी लोकांनी केल्यात. हांगां रसायनाची गळटी जावन कामगार अस्वस्थ जाल्यात. स्फोटा सारक्यो घडणुकोय घडल्यात. उजोय लागता. एकूणच हे कावला अड्डे वादग्रस्त थारल्यात. कोलवाळचे उजो लागपाचे दुर्घटने उपरांत लोकांनी पंचायतीचेर टिकेचो शिंवर केलो. ह्या अड्ड्यांचेर कडक कारवाय करची, अशी तांची मागणी आशिल्ली. हे विशीं पंचायतीचे बसकेंत चर्चा जावन कारवायेचो थाराव सगल्यांनी एकमतान मानून घेतलो.
हाचे आदीं तीन वर्सां पयलीं कोलवाळ पंचायतीन कावलां अड्ड्यां आड कारवाय केल्ली. मात, कांय अड्ड्यांच्या धनयांनी कारवायेक स्थगिती मेळयल्ली. उपरांत तांणी परवानगी नासतना बेकायदा वेवसाय सुरूच दवरिल्लो, अशें सरपंच म्हणटात. करासवाडा वाठारांत पेडण्यां वचपी रस्त्या कुशीक कावलाचे अड्डे आसात. थंय आतां गाडे, फास्ट फूड, चिकन, नुस्तें विक्री केंद्र, हाॅटेलांय उबीं जाल्यांत. हो जागो कोणाचो? थळाव्या राजकी फुडाऱ्यांचो आशिर्वाद आसले बगर हें शक्यच ना. ते जर बेकायदेशीर कामां करतात, तर तांचेर कारवाय कित्याक जायना? तांकां लायट, उदकाचें कनेक्शन कोण दिता? एका कोलवाळ पंचायत वाठारांत 51 कावला अड्डे म्हणजे खूबच जालें. फाल्यां कोलवाळाचें नांव बदलून कोणे कावलावाळ दवरलें जाल्यार गांवकारांनी वायट धरपाची गरज ना. सगल्या गांवांनी कावला अड्ड्यां कुशीक आतां इमारती जाल्यात. कांय अड्डे भरवस्तींतूय सुरू जाल्यात. भितर चलिल्ल्या कामाक लागून आवाज जाता, तो लोकांक त्रास करता, रसायनांचो वास, धुंवराचो मनस्ताप…. म्हणटकच लोकांक विचारल्यार सगलेच कावला अड्डे नाकाच म्हणटले. कोलवाळ पंचायतीच्या ह्या निर्णयाचेर अड्ड्यांच्या धनयांची कितें प्रतिक्रिया येता, तें 1- 2 दिसांनी कळटलेंच. मात, हो प्रस्न वा समस्या समजिकायेन, शांतीकायेन सुटावी जावची.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
