कोलकातान अखेरेक जोडलें जैत

भांगरभूंय | प्रतिनिधी

कोलकाता नायट रायडर्सान हारीचो क्रम मोडटना काल राजस्थान रॉयल्साक 7 विकेटींनी हारयलो. कोलकाताक जैता खातीर 153 धांवड्यांची मोख मेळिल्ली. ताणें ती 3 विकेटी वगडावन 19.1 ओव्हरींनी मेळयली. नितीश राणा (48) आनी रिंकू सिंग (42) हांणी 38 बॉलांनी नाबाद 66 धांवड्यांची भागिदारी करून कोलकाताचें जैत निश्चीत केलें.

कोलकातान सेगीत पांच हारी उपरांत पयलें जैत जोडलें. जाल्यार राजस्थानाक चवथी हार घेवची पडली.

मोखीचो फाटलाव करपी कोलकाताची सुरवात बरी जाली ना. अॅरोन फिंचाच्या रुपान पंगडाक पयलो धपको बसलो. फिंच फक्त चार धांवड्यो करून कुलदीप सेनाचो शिकार थारलो. ते उपरांत प्रसिद्ध कृष्णान बाबा इंद्रजीताक बाद करून राजस्थानाक दुसरें येस मेळोवन दिलें. इंद्रजीतान 15 धांवड्यो केल्यो. मुखेली श्रेयस अय्यरान 32 बॉलांनी 34 धांवड्यो केल्यो. ताका ट्रेण्ट बोल्टान आपलो शिकार केलो.

ते उपरांत चवथे विकेटी खातीर नितीश राणा आनी रिंकू सिंग हाणें म्हत्वाची भागिदारी केली. हे भागिदारीक लागून कोलकाताचें जैत सोंपें जालें.

मजगतीं, मुखेली संजू सॅमसनाच्या (54) अर्द शेंकड्या नेटार राजस्थान रॉयल्सान निर्धारीत 20 ओव्हरींनी 5 विकेटी वगडावन 152 धांवड्यो केल्यो. सॅमसनान 49 बॉलांनी सात चवके आनी एक सको मारलो. निमाण्या ओव्हरींनी रियान परागान 12 बॉलांनी दोन सके आनी एक चवक्याचे मजतीन 19 आनी शिमरोन हेटमायरान 13 बॉलांनी दोन सके आनी एक चवक्याचे मजतीन नाबाद 27 धांवड्यो करून पंगडाचो स्कोर 150 वयर पावयलो.

कोलकाता नायट रायडर्सा वतीन टीम सावथीन चार ओव्हरींनी 46 धांवड्यो दिवन 2 विकेटी घेतल्यो. उमेश यादव, अनुकूल रॉय आनी शिवम मावी हांणी दरेकी एकेक विकेट घेतली. सुनील नरेनान चार ओव्हरींनी फक्त 19 धांवड्यो दिल्यो.

टॉस हारल्या उपरांत पयलीं बॅटींग करपी राजस्थानाची सुरवात बाबत जाली. देवदत्त पडिक्कल फक्त दोन धांवड्यो करून तंबूंत परतलो. अंदूंच्या आयपीएलांत जबरदस्त बॅटींग करपी जोस बटलराक काल व्हड खेळी करपाक जमली ना. ताणें 25 बॉलांनी तीन चवक्यांचे मजतीन 22 धांवड्यो केल्यो. करुण नायरान 13 धांवड्यो केल्यो. 

कोलकाता नायट रायडर्सान आपल्या पंगडांत दोन बदल केले. हर्षित राणा आनी वेंकटेश अय्यर हांचे सुवातेर अनुकूल रॉय आनी शिवम मावी हांकां संद दिली.