भांगरभूंय | प्रतिनिधी
कोलकाता नायट रायडर्सान आयपीएलाचे 61वे मॅचींत सनरायझर्स हैदराबादाक 54 धांवड्यांनी हारोवन प्ले ऑफांत सुवात मेळोवपाची आपली आस्त कायम राखली.
टॉस जिखून पयलीं बॅटींग करपी कोलकाता नायट रायडर्सान निर्धारीत 20 ओव्हरींनी 6 विकेटी वगडावन 177 धांवड्यो केल्यो. मोखीचो फाटलाव करपी सनरायझर्स हैदराबादाक 20 ओव्हरींनी 8 विकेटी वगडावन 123 धांवड्यो करप शक्य जाल्यो.
ह्या जैतान कोलकाताचे 13 मॅचींतल्यान 12 गूण जाल्यात. प्ले ऑफांत सुवात मेळोवपाक ताका आपली निमाणी मॅच जिखची पडटली. तशेंच हेर मॅचींचे निकाल आपल्याक फावरादांत लागचे अशी प्रार्थना करची पडटली. दुसरे वटेन सनरायझर्स ही मॅच हारून लेगीत प्ले ऑफाचे सर्तींत आसा. ताचे 12 मॅचींतल्यान 10 गूण आसात.
ते पयलीं कोलकाताची सुरवात बरी जाली ना. पंगडाच्यो 17 धांवड्यो आसतना ओपनर वेंकटेश अय्यर फक्त सात धांवड्यो करून तंबूंत परतलो. ते उपरांत अजिंक्य रहाणे आनी नितीश राणा हांणी बरी भागिदारी करून डाव सांबाळपाचो यत्न केलो. पूण राणाक उमरन मलिकान 26 धांवड्यांचेर कॅच बाद केलो. ताणें तीन सके आनी एक चवको मारलो. कांय वेळान उमरन मलिकान अजिंक्य रहाणेकूय आपलो शिकार केलो. शशांक सिंगान ताची कॅच धरली. रहाणेन 24 बॉलांनी 28 धांवड्यो केल्यो. हातूंत तीन सक्यांचो आस्पाव आशिल्लो. परत एक फावट उमरान मलिकाचे बॉलिंगेची जादू पळोवपाक मेळ्ळी. हे खेपे मुखेली श्रेयस अय्यराचो क्रम आशिल्लो. 9 बॉलांनी 15 धांवड्यो करून तो तंबूंत परतलो.
मुखेली बाद जाल्या उपरांत सॅम बिलिंग्स आनी रिंकू सिंग हाणें जलद रितीन धांवड्यो करपाचो यत्न केलो. पूण, फॉर्मांत आशिल्ल्या रिंकू यॉर्कर किंग नटराजनाच्या बॉलाचेर एलबीडब्ल्यू बाद जालो.
पांच विकेटी वगडायल्या उपरांत बिलिंग्सान आंद्रे रसेला वांगडा मेळून डाव सांबाळ्ळो. तांणी सवे विकेटी खातीर 63 धांवड्यांची म्हत्वाची भागिदारी केली. बिलिंग्स भुवनेश्वर कुमाराच्या बॉलाचेर बाद जावचे पयलीं 29 बॉलांनी 34 धांवड्यांची खेळी केली. ते उपरांत निमाणे ओव्हरींत आंद्रे रसेलान वॉशिंग्टन सुंदरा आड 20 धांवड्यो केल्यो.
कोलकाताच्या प्लेयींग इलेव्हनांत 2 बदल केल्यात. जखमी जाल्ल्या पॅट कमिन्साचे सुवातेर उमेश यादव आनी शेल्डन जॅक्सनाचे सुवातेर सॅम बिलिंग्स आयला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
