भांगरभूंय | प्रतिनिधी
पणजीः नामनेची कोंकणी लेखिका जयमाला दणायत (75) हांकां शेनवारा मध्यानरातीं 12.30 वरांचेर बंगळूरुंत काळजाच्या आताकान मरण आयलें. मूळ जांबावलेच्याे आशिल्ल्या जयमाला दणायत हांचो राबितो मुंबय आसलो, पूण हालींच ती बंगळूरू गेल्ली.
तांचे फाटल्यान घोव नारायण, पूत अजय, सून गौरी आनी धूव अनुजा असो परिवार आसा. 17 डिसेंबर 1947 ह्या दिसा जल्मल्ल्या जयमाला दणायत हांणी फाटलीं 45 वर्सां कोंकणीची सेवा केली. कोंकणी आनी मराठी नेमाळ्यां खातीर आनी दिवाळी अंकां खातीर तांचें लिखाण चालूच आसलें. तांचें साहित्य आकाशवाणीच्या मुंबय आनी पणजी केंद्रा वयल्यान वितरायलां. मुंबय आकाशवाणी केंद्रांत कोंकणी वृत्तनिवेदक म्हणून तांणी वावर केला. मुंबय दूरदर्शनाचे कोंकणी कौस्तुभ कार्यावळींत तांणी वांटो घेतला. गोंयच्या कोंकणी पाठ्यपुस्तकांनीय तांच्या साहित्याचो आस्पाव जाला. तांच्या कथांचे हिंदींत आनी इंग्लीशींत अणकार जाल्यात.
तांकां 2007 वर्सा तांच्या आंबाड्या भोंवती तीन शेंवती ह्या पुस्तका खातीर कोंकणी भाशा मंडळाचो साहित्य पुरस्कार लाभिल्लो जाल्यार ‘रागदरबारी’ ह्या कोंकणी पुस्तकाक साहित्य अकादेमीचो 2015 वर्साचो अणकार पुरस्कार फावो जाला. लाल शुक्ला हांचे ‘राग दरबारी’ हे हिंदी कादंबरीचो तांणी कोंकणी अणकार केल्लो.
तांची आयजवेर 19 पुस्तकां प्रकाशीत जाल्यांत. तातूंत कवासो (कथासंग्रह 1978), सप्तक (बाल एकांकी संग्रह 1982), करबट (निबंद संग्रह 1994), इंद्रधोणू (बालसाहित्य 1996), म्हातारी बुद्ध (बाल साहित्य 1996), फुकटांत भोंवडी (बाल साहित्य अणकार 1994), आंबाड्या भोंवतीं तीन शेवतीं (निबंद संग्रह 2006), रागदरबारी (अणकारीत कादंबरी 2010), सांज – सावळी (कथासंग्रह 2014), झोपाळो (कथासंग्रह 2016) हांचो आसपाव आसा.
जयमाला दणायत हांच्या पुस्तकांक कोंकणी भाशा मंडळ, गोवा कला अकादमी आनी कोंकणी साहित्य कला केंद्राचे पुरस्कार फावो जाल्यात.
कोंकणी अकादेमीची आर्गांएक नम्र आनी मवाळ सभावाच्यो लेखिका म्हूण त्यो वळखीच्यो आशिल्ल्यो. एक सोज्वळ व्यक्तिमत्वाची संवेदनशील लेखिका आमचे मदल्यान ना जाल्या. तांच्या कथा आनी ललीत साहित्यांतल्यान नवोदीत लेखकांक सेगीत प्रेरणा मेळत रावतली अशें कोंकणी अकादेमीचे अध्यक्ष प्रा. अरूण साखरदांडे हांणी म्हणलां.
कोंकणी भाशा मंडळाचीं आर्गां
गोंयच्यान पयस रावन लेगीत कोंकणी भाशेची नेमान सेवा करपी एक नम्र आनी मायेस्त कोंकणी लेखक आयज आमचे मदल्यान ना जाल्या. तांच्या साहित्यांतल्यान आमकां सदांच प्रेरणा मेळत रावतली अशें कोंकणी भाशा मंडळाची अध्यक्ष अन्वेषा सिंगबाळ हांणी म्हणलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
