कोंकणी फिल्मांची निर्मिती करप गरजेचें

भांगरभूंय | प्रतिनिधी

चंद्रकांत कंवळेंकार: ‘तँम’ ह्या कोंकणी फिल्माच्या ट्रेलराचें जालें लोकार्पण

केपें: गोंयच्या पुतांनी फुडें सरून कोंकणी फिल्मांची निर्मिती करप गरजेचें. अशें केल्यारूच कोंकणी फिल्मांचो दर्जो वाडटलो अशें आदले उपमुख्यमंत्री चंद्रकांत कंवळेंकार हांणी सांगलें. कुडचड्यां ‘तँम’ ह्या कोंकणी फिल्माचो ट्रेलर आनी पोस्टराचें लोकार्पण केल्या उपरांत मुखेल सोयरे म्हणून ते उलयताले.

ह्या वेळार कुडचडें पालिकेचे नगरसेवक बालकृष्ण होडारकार, समीर नायक, फिल्माचे डायरेक्टर विनय गांवस, लेखक सी डिसिल्वा (डॅडी), किशोर देसाय आनी हेर हाजीर आशिल्ले.

अशे तरेचीं फिल्मां जावप ही काळाची गरज. गोंय म्हळ्यार नाटक आनी तियात्र इतलीच मर्यादा अशें लोक सजमताले. आतां गोंय कायमचें इटरनेशनल फिल्म फेस्टीवलाचें केंद्र जाल्ल्यान हाचो फायदो गोंयकारांक जातलो. जशीं हॉलिवूड, बॉलिवूड फिल्मां जातात तशींच येवपी काळांत कोंकणी फिल्मां तयार जातलीं. गोंयांत हिंदी, मराठी आनी हेर भासांच्या फिल्मांची शुटींग जाता. ताका लागून गोंयकारांक स्वताच्या फिल्मांची शुटिंग करपाक फायद्याचें थारतलें अशें कंवळेंकार हांणी फुडें म्हणलें. 

विनय गांवस हांणी धाडशिपणान हें फिल्म केलां. ताचें हें काम तोखणाय करपा सारकें. तशेंच तांणी गोंयच्या कलाकारांक ह्या फिल्मांत संद दिवन तांच्या कलागुणांक लोकां मुखार हाडल्यात, ही बरी गजाल. फिल्माच्या ट्रेलरा वयल्यान हें फिल्म उत्कृश्ठ दर्जाचें आशिल्ल्याचें जाणवता. हें फिल्म सगळ्या गोंयकारांनी पळोवचें. जाका लागून नव्या कलाकारांक आनीक फिल्म निर्मिती करपाची उर्बा मेळटली, अशें कंवळेकार हांणी सांगलें. 

फिल्माचो ट्रेलर पळयल्या उपरांत अशें दिसता, हें फिल्म बरें जालां. कोंकणी फिल्माचो दर्जो हिंदी आनी मराठी फिल्मां इतकोच आसा. हाका आमचें फाटबळ सदांच आसतलें अशें होडारकार हांणी सांगलें. 

गोंयच्या कलाकारांक बरी माची दिवची देखून ह्या फिल्माची निर्मिती केल्या. हातूंत शारांतले आनी गांवगिर्‍या वाठारांतले कलाकार, ज्येश्ठ आनी नवे कलाकार अशे सगळ्यांक घेवन ह्या फिल्माची निर्मिती केल्या. पुर्व कनाटकांतल्या इटरनेशनल फेस्टीवलांत हें फिल्म दाखयल्ल्यान हाका बरींच इनामांय फावो जाल्यांत. ह्या फिल्माचो 21 जानेवारीक शुभारभ जातलो, अशें विनय गांवस हांणी सांगलें.