कोंकणी खातीर शणै गोंयबाब हांणी जिवीत ओंपलें

भांगरभूंय | प्रतिनिधी

मुख्यमंत्री डॉ. प्रमोद सावंतः नवे पिळगेन भाशेचो सांबाळ करपाक फुडाकार घेवपाचो उलो

भांगरभूंय । प्रतिनिधी

दिवचलः शणै गोंयबाब हांचो वावर आयज शंबर वर्सां उपरांतूय उगडासांत उरपा सारको आसा. कोंकणी भाशेची सेवा तशेंच तिका प्रतिश्ठा मेळोवन दिवचे खातीर तांणी आपलें जिवीत ओंपलें. तांचो वावर फुडें व्हरचे खातीर नवे पिळगेन भाशेच्या माध्यमांतल्यान विशेश योगदान दिवचे खातीर फुडाकार घेवचो, अशें मुख्यमंत्री डॉ. प्रमोद सावंत हांणी सांगलें.

गोवा कोंकणी अकादेमीन दिवचल कोंकणी सेवा केंद्र आनी दिवचल लायन्स क्लब हांच्या पालवान कोंकणीचें युगपुरुस शणै गोंयबाब हांची 146वी जयंती राज्य पांवड्याचेर विवीध कार्यावळीं वरवीं मनयली.

दिवचलच्या हिराबाई झांट्ये सभाघरांतले देऊ (आबा) पळ माचयेर दीसभर कार्यावळी आयोजीत केल्ल्यो. सुवाळ्याक ज्ञानपीठ पुरस्कार जैतिवंत कोंकणी लेखक दामोदर (भाई) मावजो मुखेल उलोवपी, आमदार डॉ. चंद्रकांत शेट्ये, आमदार प्रेमेंद्र शेट, नगराध्यक्ष कुंदन फळारी, कोंकणी अकादेमीचे अध्यक्ष प्राचार्य अरूण साखरदांडे, मेघना शेटगांवकार, राजन शेट्ये, डॉ. प्रकाश वझरीकार, सदाशीव वालावलकार, आझाद कडकडे, रुपेश ठाणेकार हाजीर आशिल्ले.

भाशेचें म्हत्व सांगपी उपक्रम चालीक लावप गरजेचें आसा. गोंय विद्यापिठांत शणै गोंयबाब स्कूल ऑफ लिटरेचर विभाग सुरू केला, ताचो लाव घेवचो. कोंकणी भाश ही इंग्लीश भाशे वरीच पोट भरपाची भाशा जायत चल्ल्या. ताका लागून नोकरी मेळोवचे खातीर शेजारच्या महाराष्ट्र, कर्नाटकांतले तरणाटेय कोंकणी शिकतात. फुडल्या चार म्हयन्यां भितर राजभास संचालनालयांत तरणाट्यां खातीर खूबश्यो संदी उपलब्ध करून दितले. गुगलाचेर कोंकणी पावयिल्ले खातीर संजीव हेगडे हांचें मुख्यमंत्री डॉ. सावंत हांणी कवतूक केलें. कोंकणी साहित्य निर्मिती खातीर भाशेचें शिक्षण गरजेचें आसा. कोंकणी अणकार करप्यांक रोजगारा खातीर संदी उपलब्ध करून दितले. रोखडेच लोकसभेंत लेगीत कोंकणी अणकार करप्याची निवड करतले, अशें मुख्यमंत्र्यान सांगलें.

शणै गोंयबाब पुण्य पुरुस आशिल्ले. तांचो वावर म्हान आसा. कोंकणी हिणसायतात तें तांकां आवडानाशिल्लें. इतिहासान तांकां बेदखल करपाचो जाणिवपूर्वक यत्न केलो. आमकां खरो इतिहास शिकोवंकूच ना, अशी खंत दामोदर मावजो हांणी उक्तायली. 50 वर्सां आदीं वेदळी स्थिती आशिल्ली, आयज खूब बरे दीस आयल्यात, अशेंय तांणी सांगलें.

कोंकणी भाशा वावर, शणै गोंयबाब हांचें योगदान आनी भाशेची वाटचाल हाचेर अरूण साखरदांडे हांणी मार्गदर्शन केलें.

डॉ. प्रकाश वजरीकार हांणी येवकार दिलो. रुपेश ठाणेकार हांणी प्रास्तावीक केलें. तांणी शणै गोंयबाब हांच्या वावराचो नियाळ घेतलो. तशेंच दिवचले तांचो पुतळो बांदतले, अशें सांगलें.

शणै गोंयबाब हांचो आदर्श घेवन तांचो वावर चिकाटीन फुडें व्हरचो अशें आमदार प्रेमेंद्र शेट हांणी सांगलें.

ह्या वेळार दामोदर मावजो हांचो मुख्यमंत्री डॉ. सावंत हांचे हस्तुकीं सत्कार केलो. तशेंच महेश कडकडे, रघुनाथ तारी हांचोय मानेस्तांचे हस्तुकीं सत्कार केलो. तेचवरी प्रशांत चणेकार, विनायक गोवेकार, अमेय पळ हांचो भेटवस्तू दिवन भोवमान केलो.

समारोप सुवाळ्याक गोंय शिक्षण मंडळाचे अध्यक्ष भगीरथ शेट्ये, गोवा कोंकणी अकादेमीचे उपाध्यक्ष वसंत सावंत, रुपेश ठाणेकार हाजीर आशिल्ले.

सकाळीं उक्तावण सुवाळ्या उपरांत विद्यार्थ्यांचो भोवमान सुवाळो, कोंकणींत रोजगार आनी वेवसायाच्यो संदी, रोजगार मेळाव्या खाला अन्वेषा सिंगबाळ हांचे अध्यक्षते खाला चर्चासत्र जालें. तातूंत डॉ. भूषण भावे, अरुण भट हांणी मार्गदर्शन केलें. दनपारां प्रस्नमंजुशेंत गोंय आनी गोंया कडेन संबंदीत विशयांचेर सर्ती जाल्यो. जेवणा उपरांत उक्ती माची खाला विवीध विशयांचेर चर्चा जाली. ते उपरांत दिवचल म्हाल मुळाव्या विद्यार्थ्यां खातीर वेशभुशा सर्त तशेंच हेर कार्यावळी जाल्यो.

संसदेंत नेमतले कोंकणी खातीर अनुवादक

संसदेंत रोखडोच कोंकणी भाशे खातीर अनुवादक नेमतले. चर्चील आलेमांव खासदार आसतना तांणी संसदेंत कोंकणींतल्यान भाशण केलें, पूण तें कोणाकूच कळूंक ना. हे मुखार तशें जावचें न्हय, हे खातीर संसदेंत कोंकणी भाशे खातीर अनुवादक नेमपाची मागणी राज्य सरकारान केल्ली. अनुवादक नेमले उपरांत कोंकणींतल्यान उलयले उपरांत ताचो विवीध भाशांतल्यान अणकार हेर खासदारां मेरेन पावतलो, अशें मुख्यमंत्री डॉ. प्रमोद सावंत हांणी सांगलें.