कोंकणी अधिवेशनांत साहित्य अकादेमी जैतिवंतांचो भोवमान

भांगरभूंय | प्रतिनिधी

मालवणां 14 आनी 15 मेक जातलें अधिवेशन

पणजी : अखील भारतीय कोंकणी परिशदेचे 32वें अधिवेशन मालवण हांगा 14 आनी 15 मे ह्या दिसां जातलें. अधिवेशनाच्या उक्तावणाक ज्ञानपीठ पुरस्कार जैतिवंत दामोदर मावजो आनी साहित्य अकादेमी पुरस्कार जैतिवंताचो भोवमान जातलो. गोंयचे मुख्यमंत्री डॉ. प्रमोद सावंत हांचे हस्तुकीं अधिवेशनाचे उक्तावण जातलें. अधिवेशनांत मालवण सयत गोंय, कर्नाटक आनी केरळचे साहित्यमोगी हाजीर रावतले.
अखील भारतीय कोंकणी परिशदेच्यो अध्यक्ष उषा राणे हांणी बुधवारा पणजेंत पत्रकार परिशदेंत ही म्हायती दिली. ह्या वेळार परिशदेचे उपाध्यक्ष सुनीता काणेकार, भांडारी शशिकांत पुनाजी आनी जोड सचीव गौरीश वेर्णेंकार हाजीर आशिल्ले.
कोरोनाक लागून 2020 वर्सा कोंकणी अधिवेशन जावंक ना. हें अधिवेशन आतां 14 आनी 15 मे ह्या दिसांनी तरेकवार कार्यावळींनी जाता. शेनवारा सकाळी 10 वराचेर गोंयचे मुख्यमंत्री डॉ. प्रमोद सावंत हांचे हस्तुकी अधिवेशनाचें उक्तावण जातलें. कला आनी संस्कृताय मंत्री गोविंद गावडे हे मुखेल सोयरे म्हूण हाजीर आसतले. ज्ञानपीठ पुरस्कार जैतिवंत दामोदर मावजो, मालवणचे आमदार वैभव नायक, मालवणचे आदले नगराध्यक्ष महेश कांदळगावकार हांची उक्तावण सुवाळ्याक उपस्थिती आसतली. लेखक आनी संघटक अरूण उभयकार हे परिशदेचे अध्यक्ष आसतले. ज्ञानपीठ पुरस्कार जैतिवंत दामोदर मावजो हांचे सयत साहित्य अकादेमी पुरस्कार जैतिवंतांचो उक्तावणाक भोवमान जातलो. निलबा खांडेकार, आर एस भास्कर, संजीव वेरेंकार, राजश्री बांदोडकार कारापूरकार, जयश्री शानबाग, सुमेधा कामत देसाय, हेमंत अय्या, संपदा कुंकळयेंकार, श्रद्धा गरड, जयंती नायक व्ही. कृष्णा वाडियार, काजरो सिनेमाचे पटकथा लेखक डॉ. प्रकाश पर्येंकार, काजरो सिनेमाचे निर्माते राजेश पेडणेंकार हांचो भोवमान जातलो. कवी संमेलनां, चर्चासत्रां तशेंच सांस्कृतीक कार्यावळी अधिवेशनांत जातल्यो. आयतारा दनपारां अधिवेशनाचो समारोप जातलो. समारोप सुवाळ्याक कोंकणी साहित्यीक हेमा नायक ह्यो मुखेल सोयऱ्यो म्हूण हाजीर आसतल्यो. अधिवेशनाक वचपा खातीर आयोजकांनी पणजी तशेंच मडगांव सावन बशीची वेवस्था केल्या.
पयल्या दिसा शेनवारा उक्तावणा उपरांत गोंय प्रशासनांत कोंकणी भाशेचो वापर : स्थिती आनी कृती ह्या विशयाचेर परिसंवाद जातलो. दिनेश मणेरकार हांचे अध्यक्षते खाला जावपी परिसंवादांत कमलाकर म्हाळशी, संदेश बांदेकार आनी स्नेहा सबनीस वांटेकार जातली. जेवणा उपरांत उर्जिता भोबे हांचे अध्यक्षते खाला कवी संमेलन जातलें. उपरांत डॉ. कस्तुरी मोहन पै हांच्या फुडारपणा खाला गोंय, कर्नाटक, केरळ आनी महाराष्ट्र राज्यांतले कोंकणी शिक्षण हे विशयाचेर परिसंवाद जातलो.
दुसरे दिसा आयतारा घांटमाथो प्रदेशांत कोंकणी भास आनी संस्कृतायेचे संवर्धन हाचेर परिसंवाद जातलो. उपरांत गौरीश वेर्णेंकार हांच्या फुडारपणा खाला ज्येश्ठांचे कवी संमेलन जातलें. कोंकणातल्या दर्यादेगेवेल्या वाठारांतले परंपरीक कला वेवसाय ह्या विशयाचेर परिसंवाद जातलो. आयतारा दनपारां समारोप जातलो. समारोपाक कार्याध्यक्ष रॉनाल्ड बुथेलो, परिशदेचे अध्यक्ष अरूण उभयकार, सिंधुदुर्ग जिल्हो बँकेचे संचालक व्हिक्टर डांटोस हांची उपस्थिती आसतली. येवकार समितीचे सहकार्यदर्शी जेम्स फर्नांडीस हे उपकार मानतले.