भांगरभूंय | प्रतिनिधी
उदय भेंब्रे : मडगांव शोकसभेंत नागेश करमली, नारायण मावजो हांकां आर्गां
मडगांव : कोंकणी मळार आमी खूब कितें जोडलें, तें पयशांच्या बळार न्हय, सत्तेच्याय बळार न्हय, तर निश्ठेच्या बळार. मुक्ती, जनमत कौल, राजभास अशे येशाचे पांवडे आमी हुपले, ताका कारण फक्त निश्ठा. जांणी ही निश्ठेची देख दिल्या, तांचो उगडास दवरपाचो यत्न जावंक जाय. भाशा, गोंय, कले खातीर जे गोंयकार वावुरल्यात तांचे ल्हानशें चरित्र बरोवपाक जाय. निश्ठेन, अर्थपूण योगदान दिलां, तांची नव्या पिळग्यांक वळख उरपाक जाय. तेच निश्ठेंतल्यान ही पिळगी मुखार वचपाक जाय, अशें मत ज्येश्ठ विचारवंत, कवी उदय भेंब्रे हांणी उक्तायलें.
कोंकणी भाशा मंडळान आयोजित केल्ल्या कोंकणी भाशेच्या संघर्श पर्वाचे निश्टावान झुजारी हे शोकसभेंत ते उलयताले. हालींच संवसाराक अंतरिल्ले नागेश करमली आनी नारायण मावजो हांकां आर्गां ओंपपाक ही कार्यावळ कोंकणी भाशा मंडळान आयोजीत केल्ली. ही कार्यावळ कोंकणी भवनांत जाली.
दामोदर मावजो हांणी नारायणबाब आनी नागेशबाबांच्या यादींचेर उजवाड घालाे. नारायणबाब हे म्हजे आदर्श, म्हाका घडोवपी, इश्ट. म्हजे जिणेंतले बरे प्रसंग तांचे साक्षीन जाल्यात. हांव शिकपा खातीर मडगांवां आयलो तेन्ना नारायणबाबाचे स्टुडियोक लागीं गेलो. म्हाका आनीक कोणाची गरज पडली ना. स्टुडियोन हांव घडलों. नारायणबाबाची डायरी, नागेशबाबाची कविता हें संचीत तांणी आमचे खातीर दवरलां, अशें भाई मावजो हांणी सांगलें.
म्हाका घडोवपांत नागेशबाब आनी नारायणबाब हांचें व्हडलें योगदान आसा. आकाशवाणी, उपरांत साहित्याच्या मळार हांव नागेशबाबाक लागून पावलों, अशें एन. शिवदास हांणी सांगलें.
हे सभेंत हेमा नायक, डाॅ. वेंकटेश हेगडे, डॉ. राजेंद्र हेगडे, अखील भारतीय कोंकणी परिशद – अध्यक्ष अरुण उभयकार, गोवा कोंकणी अकादेमी – उपाध्यक्ष वसंत भगवंत सावंत, गोंय विद्यापीठ- शणै गोंयबाब भास आनी साहित्य महाशाळा, संचालक – डॉ. हनुमंत चोपडेंकार, काणकोण कोंकणी कला केंद्र – उल्हास पै भाटीकार, शणै गोंयबाब सेवा केंद्र, कुडचडें – विठ्ठल आवदियेंकार, कविता ट्रस्ट आनी कोंकणी भास आनी साहित्य प्रतिश्ठान, मंगळूर – मेल्विन रॉड्रिगीश, भांगराळे गोंय- डॉ. पूर्णानंद च्यारी, फादर फ्रेडी जे डिकोस्ता मेमोरियल ट्रस्ट – फाऊस्तो डिकोस्ता, साहित्य मंथन, सत्तरी – गोपीनाथ गांवस, मठग्रामस्थ हिंदू सभा- अनील पै
विद्या भुवन कोंकणी शाळा – अनंत अग्नी हांचीं आर्गां ओंपपी, उगडास सांगपी उलोवपां जालीं.
आमी पेडणेंकार , बार्देस आस्मिताय केंद्र, दिवचल कोंकणी सेवा केंद्र, सांखळी कोंकणी सेवा केंद्र, हेमाडबार्शें कोंकणी सेवा केंद्र, उक्ते मळब, कोंकणी लेखक संघ, थॉमस स्टिफन्स केंद्र हांणीय दोनूय मानेस्तांक आर्गां ओंपलीं.
सभेचे संयोजन कोंकणी भाशा मंडळाची अध्यक्ष अन्वेषा सिंगबाळ हांणी केलें. सुरवेक नागेशबाब आनी नारायण भाऊ हांच्या घरच्यांच्या सांगातान कोंकणी भाशा मंडळाच्या कार्यकारी समितीच्या वांगड्यांनी नागेश बाब आनी नारायण भाऊ हांच्या फोटवांक फुलां ओंपून आर्गां ओंपलीं.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
