भांगरभूंय | प्रतिनिधी
म्हामार्गार अपघात घडपाची शक्यताय
फोंडें: केरये-खांडेपार हांगासरल्या राष्ट्रीय म्हामार्गाचे कुशीक व्हड संख्येन अवजड वाहनां पार्क करतात. ताका लागून मार्गा वयले येरादारीक त्रास जाता. तातूंत खूबशे कंटेनर रस्त्याचे कुशीक आडकून पडपाचे प्रकार अदीक घातक जायत आशिल्ल्यान, वाठारांत अपघात घडपाची शक्यताय आसा.
केरये-खांडेपारा रस्त्याचे कुशीक पार्कींग करता आसतना कंटेनराची फाटली बाजू रस्त्याक लागत आशिल्ल्यान वाहनां आडकून पडटात. आडकून पडिल्लो कंटेनर काडपा खातीर वाहन चालकांची गर्दी रस्त्यार दिसून येता. घडये म्हामार्गा वयल्यान वचपी वाहनाचो ब्रेक फेल जालो जाल्यार रस्त्यार थांबिल्ल्या वाहन चालकांक धोको उप्रासूं येता.
वाठारांत सप्तकांतल्यान दोन ते तीन फावटी कंटेनर आडकून पडपाचे प्रकार हे सुवातेर घडत आसतात. ताका लागून वाठारांतल्यान गतीन वचपी वाहनांक लागून अपघात जावपाची शक्यताय वाडल्या.
फाटल्या कांय दिसा सावन रस्त्याच्या दोनूय वटांनी व्हड संख्येन अवजड वाहनां पार्क करतात. दुचाकी आनी चार चाकी वाहनांक हे सुवातेर अपघात घडपाची शक्यताय चड आसा. दोन-तीन दिसां पयलीं तीन वेगळ्यावेगळ्या वाहनांक एकाच वेळार अपघात जालो. येरादारी पुलीस हांगा वाहन चालकां आड कारवाय करतना दिसून येतात. पूण दीसपट्टी वेगळींवेगळी वाहनां गोंयांत दाखल जायत आशिल्ल्यान पुलिसांक लेगीत हाचो त्रास जाता. हातूंत खूबशे समाजीक कार्यकर्ते सेगीत पुलिसांक फोन करून रस्त्यार आडमेळीं निर्माण करपी वाहनां कुशीक काडपाची मागणी करीत आसतात. एखादो व्हड अपघात घडचे पयलीं येरादारी खात्यान ह्या विशया कडेन गंभीरतायेन लक्ष दिवपाची मागणी वाहन चालकां कडल्यान जायत आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
