भांगरभूंय | प्रतिनिधी
केपें: आंबेघाट मानगाळच्या रान वाठारांत अज्ञात चलयेचो सांगाडो पोतयेंत सांपडलो. तो कोणाचो आनी तो कोणे हाडून उडयला, ताचो सोद केपें पुलीस घेतात.
केपें पुलिसांनी दिल्ले म्हायती प्रमाण नेत्रावळी ते गांवडोंगरी वचपी रस्त्याचेर आंबेघाट मानगाळ वाठारांत रस्त्याचे कुशीक कांय अंतराचेर पोतयेंत एके चलयेचो सांगाडो मेळ्ळा. बुधवारा सांजे वेळार हे विशींची म्हायती मेळटाच पुलीस थंय पावले. तांणी तो सांगाडो ताब्यांत घेवन पोस्टमार्टमा खातीर धाडलो.
हो वाठार नेत्रावळी सावन लागीं आसलो तरीय थंय पुलीस स्टेशन ना. हो वाठार केपें पुलीस स्टेशनाचे हद्दींत येता. ह्या वाठारांत चडशें रान आसा. कोणेतरी ते चलयेचो खून करून कूड थंय हाडून उडयिल्ल्याचो दुबाव आसा. एका म्हयन्या आदीं ही घडणूक घडिल्ली आसपाक जाय. तिचो गळो अंदून खून केल्ल्याचोय पुलिशेक दुबाव आसा. तो सांगाडो पोस्टमार्टमा खातीर धाडला. ती गोंयकार चली काय बिगर गोंयकार हाचोय सोद घेवप चालू आसा. तशेंच हें काम करप्याचोय पुलीस सोद घेतात, अशें केपेंचे पुलीस निरिक्षक दीपक पेडणेंकार हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
