भांगरभूंय | प्रतिनिधी
अमोल काणेकारः एका दिसाचें उपास आंदोलन
भांगरभूंय । प्रतिनिधी
केपें: केपें नगराध्यक्षान आपल्या पदाचो गैरवापर करून आपल्या चल्याक पालिकेंत नोकरी दिली. असो आरोप करून केपेचे नगरसेवक अमोल काणेकार हांणी एका दिसाचो उपास आंदोलन केलें.
नगरसेविका आलिंडा लासेंडा, जेकिना डायस, संजील डिकॉस्टा, अभय बोरकार, रोहीत बरड, गौरंग नायक, गौरीश वेर्णेंकार आनी हेरांनी येवन अमोल काणेकार हांकां तेंको उक्तायलो.
केपेंची नगराध्यक्षान आपल्या पदाचो गैरवापर करून एजन्सी खाला आपल्याच चल्याक एमटीएस पदाचेर पालिकेंत भरती केला. ताच्या विरोधांत आपणे एका दिसाचें उपास आंदोलन केलां. तिचो घरकार लेगीत पालिकेंत कामाक आसा. लोक आपलीं कामां जावची हे खातीर फुडाऱ्यांक वेंचून दितात, पूण सत्ता हातांत येताच आपल्या पदाचो गैरवापर करून आपल्या घऱच्यांकूच नोकरी दितात, अशें काणेकार हांणी सांगलें. नगराध्यक्षान आपल्याच चल्याक पालिकेंत नोकरी दिवपाची ही पयलीच खेप. ताका लागून हो दीस काळो दीस म्हूण मनवचो. नगराध्यक्षाचो घरकार पालिकेंत काम करता आनी कांय म्हयन्यांनी तो निवृत्त जातलो. तशेंच तो शिरवय कोमुनिदाद एटर्नी आसा. कोमुनिदाद जी जमीन दिता, तिका वीज, उदकाचें कनेक्शन दिवचे खातीर पालिकेंत तांचोच मनीस जाय. आपणें डीएमाक अपात्रता निवेदन भेटयला. नगराध्यक्ष आनी तिच्या घरकाराक बडतर्फ करचे. तशेंच ताच्या चल्याकूय कामा वयल्यान काडून उडोवचो, अशी मागणी आपणें निवेदनांत केल्या. हातूंत लक्ष घातलें ना जाल्यार 15 दिसांनी परतून एका दिसाच्या उपास आंदोलनाक बसतलो, अशें अमोल काणेकार हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
