भांगरभूंय | प्रतिनिधी
निजामुद्दीन एक्सप्रेस थांबयली कुळ्यां
फोंडें: कॅसलरॉक कर्नाटक हांगा 3 नंबर बोगद्या कुशीक म्हाल व्हरपी रेल्वेचो एक डबो काल (आयतारा) दनपारां 4 वरांच्या सुमाराक घसरलो. रेल्वेचो डबो काडपा खातीर कर्मचारी घडणूक थळार दाखल जाले. रेल्वेचो डबा घसरिल्ल्यान फाटल्यान येवपी निजामुद्दीन एक्सप्रेस रेल्वे कुळें स्टेशनार थांबयली.
फाटल्या कांय दिसां सावन कॅसलरॉक वाठारांत उटंगाराचो पावस पडत आशिल्ल्यान काल दनपारां म्हाल व्हरपी रेल्वेचो फाटलो एक डबो घसरलो. ही खबर मेळटकूच रेल्वे अधिकारी आनी कर्मचारी घडणूक थळार दाखल जाले. रातीं उसरां मेरेन डबो रुळा वयल्यान काडपाचें काम सुरू आशिल्लें.
रेल्वेचो डबो काडपाचें काम झुजा पांवड्यार सुरू आशिल्ल्यान कुळ्यां निजामुद्दीन एक्सप्रेस रेल्वे स्टेशनार थांबयली. रेल्वे अधिकाऱ्यांनी दिल्ले म्हायती प्रमाण रातीं 1 वरां मेरेन डबो रुळा वयल्यान काडले उपरांत निजामुद्दीन एक्सप्रेस सोडटले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
