भांगरभूंय | प्रतिनिधी
मुख्यमंत्री डॉ. प्रमोद सावंतः मयां महामाया शिक्षणीक वास्तूचें उक्तावण
भांगरभूंय । प्रतिनिधी
दिवचलः मयां सारकिल्ल्या गांवगिऱ्या वाठारांत पूर्व मुळावे ते उच्च माध्यमिका मेरेनच्या शिक्षणा खातीर बऱ्या दर्जाच्यो मुळाव्यो सुविधा आनी प्रयोगशाळा उपलब्ध करून विजयानंद ज्ञानप्रसारक संस्थेन शिक्षणीक मळाचेर क्रांती केल्या. बऱ्या दर्ज्याची कुशळटाय विकसीत करपाचें शिक्षण लेगीत सुरू करून गांवगिऱ्या वाठारांतल्या भुरग्यांक रोजगाराच्यो खूबश्यो संदी उपलब्ध जातल्यो, हाचेर लक्ष दिवचें. आत्मनिर्भर गोंय सरकाराची मूळ संकल्पना आसा. ते खातीर गांवगिऱ्या वाठारांतल्या शिक्षणाचेर विशेश लक्ष केंद्रीत केलां. नवें शिक्षणीक धोरण क्रांती घडोवपाक तयार रावलां. कुशळटाय उदरगत प्रशिक्षणाचेर सरकार भर दितलें, अशें मुख्यमंत्री डॉ. प्रमोद सावंत हांणी सांगलें.
तिखाजन मयेंचे श्री विजयानंद ज्ञानप्रसारक संस्थेचे श्री महामाया हायस्कूल इमारत नुतनीकरण प्रकल्पाच्या उक्तावण सुवाळ्यांत मुख्यमंत्री डॉ. सावंत उलयताले. ह्या वेळार तांचे वांगडा आमदार प्रेमेंद्र शेट, उद्देजक डॉ. सागर साळगांवकार, डॉ. भानू मंजुनाथ, संस्थेचे अध्यक्ष रुपेश ठाणेकार, शिक्षण मंडळाचे भगीरथ शेट्ये, सरपंच दिलीप शेट, निळकंठ मराठे, शांबा पेडणेंकार, सुवर्णा चोडणकार, उदय पत्रे, संस्थेचे पदाधिकारी आनी पंच हाजीर आशिल्ले.
पयसो आसलो तरीय इत्साशक्ती बगर काम जायना. रुपेश ठाणेकार पंगडान गांवगिऱ्या वाठारांत बरो शिक्षणीक उपक्रम हातांत घेवन बुन्याद घटमूट केल्या. गांवांतली भुरगीं गांवांतूच बारावे मेरेन शिकचीं, ही बरी भुमिका आसा. हे मुखार गांवगिऱ्या वाठारांतल्या शिक्षणा कडेन सरकार विशेश लक्ष केंद्रीत करतलें, अशें मुख्यमंत्री डॉ. सावंत हांणी सांगलें.
मयें वाठारांत दर्जेदार शिक्षणाची वेवस्था करून आदर्श नागरीक घडोवपाचो वसो घेतिल्ले खातीर आमदार प्रेमेंद्र शेट हांणी खोस उक्तायली. तेचवरी संस्थेच्या वावराचें कवतूक केलें.
नवें शिक्षणीक धोरण हितकारक आनी भोवआयामी विद्यार्थी घडयतलें, अशें भगीरथ शेट्ये हांणी सांगलें.
डॉ. सागर साळगांवकार हांणी गांवगिऱ्या वाठारांत बरी सुविधा निर्माण करून शिक्षण मळाचेर व्हड वावर केल्ले खातीर संस्था वेवस्थापनाक खाशेलीं परबीं दिलीं. तेचवरी डॉ. मंजुनाथ, शांबा पेडणेंकार हांणीय संस्थेक शुभेत्सा दिल्यो.
सगळ्यांच्या आदाराक लागून मयां दर्जेदार शिक्षणीक सुविधा निर्माण करप शक्य जालें, अशें रुपेश ठाणेकार हांणी येवकाराच्या उलोवपांत सांगलें.
हे कार्यावळींत डॉ. सागर साळगांवकार, डॉ. मंजुनाथ, निळकंठ मराठे, शांबा पेडणेंकार, रुपेश ठाणेकार हांचो मुख्यमंत्री डॉ. सावंत हांचे हस्तुकीं भोवमान केलो. उदय पत्रे हांणी सुत्रसंचालन केलें.
दरेका हाताक रोजगार दिवपाची मोखः मुख्यमंत्री
अर्दशिक्षीत भुरग्यांक रोजगार मेळचो हे खातीर कुशळटाय उदरगतींत विवीध अभ्यासक्रम सुरू केल्यात. तंत्र निकेतन, मनीस संसाधन तशेंच विवीध शाळांनी अशे उपक्रम सुरू करून रोजगाराच्यो संदी दर हाताक मेळच्यो, ही मोख आसा. नवें शिक्षणीक धोरण फुडल्या वर्सां सावन पुराय तरेन चालीक लागतलें. ते वरवीं भुरग्यांच्या सगळ्या गुणांक चालना मेळटली, अशें मुख्यमंत्री डॉ. प्रमोद सावंत हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
