भांगरभूंय | प्रतिनिधी
भांगरभूंय प्रतिनिधी
कुडचडेः कुडचडें दयानंद कला केंद्राक 50 वर्सां पुराय जाल्ले खातीर केंद्राक देशांत तशेंच राज्याचे सांस्कृतीक मळार नामना मेळोवन दिवपाची कामगिरी करपी संस्थेच्या बारा वांगड्यांचो भोवमान करतले. ही कार्यावळ 3 मेर सांजे 4.30 वरांचेर कुडचडें हांगच्या रवींद्र भवनांत केंद्राच्या भांगरा कीर्ती पर्व कार्यावळींत जातली.
सुवाळ्यांत उदयपूरच्या पश्चीम क्षेत्र सांस्कृतीक केंदाचो गोंयचो आदलो प्रतिनिधी अॅड वल्लभ देसाय, राज्याच्या कला आनी सांस्कृतीक खात्याचे पयले संचालक मोर्तू नायक, गोंय कला अकादमीचो वांगडी बंटी उडेलकार, गोंय क्रिकेट क्रिकेट असोसिएशनाचो आदलो उपाध्यक्ष मनोहर नायक, गोंय कोंकणी अकादमीचो वांगडी ज्ञानेश्वर नायक, राष्ट्रीय क्रिकेट अंपायर रवींद्र बुक्कम, गोंय तियात्र अकादमीचो आदलो उपाध्यक्ष विलियम फर्नांडीस, मुंबयच्या युवक बिरादरीचो गोंय राज्य प्रतिनिधी नारायण नायक, गोंय राज्य सरकारी कर्मचारी संघटनेचो आदलो उपाध्यक्ष शिवाजी वस्त, गोंय राज्य ज्येश्ठ नागरीक कल्याण समितीचो वांगडी राया देसाय, केंद्राचो ज्येश्ठ वांगडी सदानंद खांडेकार, ज्येश्ठ वांगडी भिकू नायक हांचो भोवमान करतले. तशेंच दयानंद कला केंद्राक प्रसिद्धी मेळोवन दिवपी ज्येश्ठ पत्रकार प्रकाश कुर्डीकार आनी तरूण भारताच्या राजू भि. नायक हांचोय भोवमान करतले.
भोवमान कार्यावळीक कला आनी संस्कृती मंत्री गोविंद गावडे मुखेल सोयरे म्हणून हाजीर रावतले. तांचे हस्तुकीं भोवमान जातलो. कार्यावळीचे अध्यक्ष कुडचड्याचे आमदार आनी बांदकाम मंत्री नीलेश काब्राल आसतले. कार्यावळीक कला मोगींनी व्हडा संख्येन हाजीर रावचें अशें दयानंद कला केंद्राच्या जाळवणदारांनी मागलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
