भांगरभूंय | प्रतिनिधी
लँड्री मास्कारेन्हास नवो नगराध्यक्ष जावपाची शक्यताय
मडगांव: कुंकळ्ळीचे नगराध्यक्ष लक्ष्मण नायक हांचे आडचो अविस्वास थाराव 9 आड 0 मतांनी संमत जालो. कुंकळ्ळी नगरपालिकेचेर आमदार युरी आलेमांव समर्थक नगरसेवकांची सत्ता आसा. 14 नगरसेवक आशिल्ले हे पालिकेंत लक्ष्मण नायक हे 27 म्हयने नगराध्यक्षपदार आशिल्ले. तांचे आड आठ नगरसेवकांनी अविस्वास थाराव हाडिल्लो.
नव्या नगराध्यक्षपदार लँड्री मास्कारेन्हास हांची निवड जावपाची आसून णव नगरसेवकांनी तेंको दिला. तशेंच उपनगराध्यक्षपदा खातीर उदेश नायक देसाय हांची निवड शक्य आसा. लक्ष्मण नायक हांचे आड मतदान करपी नगरसेवकांचो तांकां तेंको आसा. अविस्वास थाराव संमत जाले उपरांत हाजीर आशिल्ल्या 9 नगरसेवकांनी एकठांय येवन फोटूय काडलो.
नगराध्यक्ष लक्ष्मण नायक हांचेर लँड्री मास्कारेन्हास, रेमंड डिसोझा, जॉन डायस, अँथनी वाझ, जामिरा पिरीस, रेखा फर्नांडीस, गौरी शेटकार ह्या युरी आलेमांव समर्थक नगरसेवकां सयत अपक्ष नगरसेवक उदेश देसाय हांणी अविस्वास थाराव दाखल केल्लो. कुंकळ्ळी नगरपालिका ही 14 नगरसेवकांची आसून आठ जाणांनी अविस्वास थारावा वेळार मतदान केल्ल्यान लक्ष्मण नायक हांचे नगराध्यक्षपद गेलें.
लक्ष्मण नायक हेवूय युरी आलेमांव समर्थक नगरसेवक आशिल्ले आनी तांकां दोन वर्सां खातीर नगराध्यक्ष केल्लो. तांकां हाचे आदीं नगराध्यक्षपद सोडपाक सांगिल्लें. पूण तांणी नगराध्यक्षपदाचो राजिनामो दिवंक नाशिल्ल्यान तांचेर अविस्वास थाराव हाडलो.
पालिका प्रशासन संचालकांनी काडिल्ल्या आदेशा प्रमाण 27 जून दिसा सकाळीं 11 वरांचेर बसकेचें आयोजन केल्लें. हे बसकेंत अविस्वास थारावाचेर चर्चा केली आनी निमाणें नगराध्यक्ष लक्ष्मण नायक हांचे आड अविस्वास थाराव संमत केलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
