भांगरभूंय | प्रतिनिधी
भांगरभूंय । पत्रक
पणजीः गोंयांतल्या किनेको कंपनीन तांच्या पिळर्ण उद्देगीक वसणुकेंतल्या उत्पादन विभागांत वंदे भारत सेमी-हाय स्पीड रेल्वे खातीर तयार केल्ल्या कम्पोझिट फ्रन्ट स्ट्रक्चराचे (रेल्वे नोज) वितरण फाटल्या बुधवाराक केलें. केंद्रीय अर्थमंत्री निर्मला सीतारमण हांणी अंदूच्या अर्थसंकल्पांत देशांत 400 वंदे भारत रेल्वे सुरू करपाची घोशणा केल्ली. ह्या रेल्वेंक लोकोमोटिवांची गरज आसता. तातूंत युरोपियन पद्दतीचीं सिटा, डिफ्यूज एसईडी लायटी, ऑटोमॅटीक दारांची वेवस्था आसतली.
रेल्वे मार्केटांत आघाडेर आशिल्ले किनेको कंपनीन 68 वंदे भारत रेल्वेचीं फ्रन्ट स्ट्रक्चरां तयार करपाचें काम मेळ्ळां. आपलें पयलें स्ट्रक्चर कंपनीन चेन्नयच्या इन्टेग्रल कोच फॅक्टरीचे सुवादीन केलें. ह्या वेळार किनेकोचे संस्थापक आनी वेवस्थापकीय संचालक शेखर सरदेसाय हाजीर आशिल्ले. संवसारीक दर्जाचीं ट्रेन इन्टेरियर आनी सब सिस्टम आमकां मेळ्ळा हें आमकां मेळिल्लो भोवमान आसा अशें तांणी सांगलें. किनोको कंपनी संवसारीक मार्केटांत हायस्पीड रेल्वे खातीर फुडले पिळगेचे उत्पादनां हाडटली अशे तांणी ह्या वेळार जाहीर केलें.
वंदे भारत रेल्वे खातीर फ्रन्ट स्ट्रक्चर तयार करपाचें काम आव्हानात्मक आशिल्लें. मात आमी तें येसस्वीपणान तयार केले. पयलीं ती विदेशांतल्यान हाडचीं पडटाली. आमी तें देशांत तयार केल्यांत. आत्मनिर्भर भारत संकल्पनेंतल्या हें एक व्हडलें पावल आसा, अशें किनेकोच्या रेल विभागाचे मुख्य ऑपरेटिव्ही अधिकारी रवी श्रीवास्तव हांणी सांगलें. अॅरोस्पेस, संरक्षण, रेल्वे आनी उद्देगीक मार्केटांत किनेको आघाडीची कंपनी जाल्या अशें तांणी नमूद केलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
