भांगरभूंय | प्रतिनिधी
वेंचणुकांनी मतां कशीं मेळोवं येता हाचेरूच राजकारण्यांची भर आसता. मतां मेळोवपा खातीर कितें करूं येता ह्या एकाच विचारान तांकां पिशे केल्ले आसता. मतां खातीर मतदारांक कशे पिशे करप हें राजकारण्यां बगर आनीक कोणाक कळटलें? ते खातीर मागीर ते मतदारांक मळबांतले गिरे लेगीत हाडून दिवंक तयार आसतात. दर एकल्याक इतलो तेंप जावंक नाशिल्लो गांवचो विकास करचेली उमळशीक. देश स्वतंत्र जावन पाऊणशें वर्सां आनी गोंय मुक्त जावन साठ वर्सां जालीं. पूण अजून विकास म्हणल्यार कितें तेंच आमकां कळूंक ना. आनी कळूंक नाशिल्लो विकासूच सगळ्यांक करचेली उमेद. मजा म्हणल्यार एक दोनदां सत्ता भोगिल्लोय विकास जावंक ना म्हणपाचें सांगता आनी मतां मागता. पूण बाबा तुवें इतलो तेंप कितें केलें हाची जाप मात ताचे कडेन आसना.
सद्याक ग्रामपंचायतीच्या वेंचणुकांचो बोवाळ चल्ला. उमेदवार आनी तांचे कार्यकर्ते दारादारांनी भोंवन प्रचार करतना दिसतात. फाटीं जाल्ल्या विधानसभा वेंचणुकांवेळार घरांघरांनी भोंवन लोकांची माहिती पुंजावपाचो एक नवो ट्रेंड पळोवंक मेळ्ळो. लोकूय बाबडे आपणांक कितेंतरी मेळटलें हे आशेन सगळी माहिती दिवंक लागले. कोणाक पांच हजार तर कोणाक लाख मेळपाचे आसले. उपरांत ते माहितीचो कोणाक कसलो फायदो जालो आनी कोणाक कितें मेळ्ळें तें सगळेच जाणात. पूण, हो ट्रेंड अजून गेल्लो दिसूंक ना. पंचायत प्रचारा वेळार परत तो पळोवंक मेळ्ळो. दर एका घराची आनी घरांतल्या मनशांची माहिती हे उमेदवार पुंजायतना दिसले. तशी पंच जावंक सोदप्यांक वाड्यावेल्या लोकांची माहिती आसप गरजेचें. पूण सद्याक जे पद्दतीन हांचो प्रचार चल्ला ताचेवेल्यान वेंचून आयल्यार फुडाराक हे लोक कितें दिवे लायतले तें कळटा.
कोणतरी एक एडव्होकेट आमच्या वाड्यार उबी रावल्या. ती प्रचारा निमतान आमगेर पावली. आमची माहिती घेवन तिणें आमकां कांय प्रश्न केले. तिचो पयलो प्रश्न, ‘तुमी कसल्यो सरकारी सवलती घेतात?’ आमची जाप, ‘कसल्योच ना.’ तिचो प्रश्न, ‘कित्याक ना? घेवंक जाय त्यो सवलती. हांव वेंचून आयल्यार तुमकां मेळोवन दितां.’ खरें म्हणल्यार आमचें घर आनी दारांत उबी आशिल्ली गाडी पळेतकूच सरकारी सवलती विशीं आमकां कोणेय विचारप हीं मुर्खपणां. आमकांच न्ही तर जाचें स्वताचें घर आसा आनी जाचे कडेन गाडी आसा ताका सवलती घेवपाचो कसलोच अधिकार ना. आनी कोणूय घेता जाल्यार ताचे इतलो दळिद्री आनीक कोणूच ना म्हणपाचो. आनी ही उमेदवार आमकां सवलतीचें हांयस दाखयता. आमची जाप, ‘आमकां त्या सवलतींची गरज ना.’ हाचेर तीचें मत, ‘तरीय घेवंक जाय. आनी तुमकां नाका जाल्यार कोणाय गरिबांक काडून दिवंक जाय.’ आतां कितें उलोवप असल्यांमुखार ? ह्या असल्या लोकप्रतिनिधींक लागुनूच सरकारी नोकरी करतल्यांक गृह आधार घेवपाचें धाडस जाता.
सरकार जें कितें दिता तें कित्याक? कोणे घेवपाचें तें? आतां गरज नाशिल्लोय जर घेवंक लागलो तर कशें जावपाचें? आमी एक विसरूंक फावना कीं संवसारांत फुकट कांयच मेळना. जें मेळटा तें आमचेच कडल्यान वता. पूण आमच्या राजकारण्यांक हें सांगल्यार मतां कशीं मेळटलीं? आनी मतां खातीरूच हे राजकारणी लोकांक नाका जाल्लीं हांयसा दाखयतात. आतां फुकट मेळ्ळ्यार कोण सोडटलो? परिणाम जाका जाय ताका मेळना आनी दोनूय हातांनी खावपाची तांक आशिल्ले ह्यो सवलती घेतात.
सुमार धा वर्सां आदली खबर. हांव फोंडेचे एके बँकेंत गेल्ले कडेन एक बायल नदरेक आयली. हांव तिका वळखतालों. तिचो घरकार जो आमच्याच खात्यांत काम करतालो तेन्नाच संवसाराक अंतरिल्लो. आनी ताचें पेंशन आपल्या नांवार करूंक कितें करपाचें तें विचारूंक ती म्हजे कडेन पयलीं आयिल्ली. तिचे कडल्यान म्हाका कळ्ळें ती पेंशना खातीर बँकेंत अकावंट उगडूंक आयल्या. पूण आमच्या ऑफिसाचें पेंशन दुसर्या बँकेंत वतलें ह्या न्हय, म्हणपाचें तिका सांगलें तर तिणें म्हळें, ऑफिसाचें पेंशन न्ही सर. हें दोन हजारांचें सरकारी पेंशन. हांवे तिका सांगलें तुका एक पेंशन घेतना दुसरें घेवंक मेळना. तर तिणें म्हणलें, सर, आमच्या आमदारान सांगलां आपूण मेळोवन दितां म्हणून. ताणेंच सांगलें दुसरे खंयचेय बँकेंत अकावंट उगड आनी पासबूक हाडून दी. मुखावेलें आपूण पळेतां म्हूण. आमदारान सांगलें आनी तिणें आयकलें.
आतां सरकारान दोन हजार आठशें सरकारी कर्मचार्यां कडल्यान पयशे परते मागल्यात. हातूंत पेंशनर्स आसात जाल्यार खबर ना. पूण आज नासल्यार फाल्यां नदरेक येवं येतात. आनी जर तांचे कडल्यान पयशे परत घेवचे पडले जाल्यार कितें जातलें? खरें तर सरकारान ह्या लोक प्रतिनिधींचेर कारवाय करूंक जाय. जाणीं तांच्या फॉर्माचेर सही मारल्या त्या पंच, सरपंच, आमदार हांचे कडसून वसुली करून घेवंक जाय. ह्या लोकांनी मतांच्या आशेन लोकांक फुलयल्यात आनी सरकारी तिजोरी लुटल्या. खरी कारवाय हांचेर जावंक जाय. फकत सरकारी कर्मचारीच न्ही तर जांचे घरकार युरोप, गल्फ देशांनी वा बोटींचेर काम करतात तांच्योय बायलो ह्यो सवलती घेतात. व्हडली गाडी घेवन बँकांनी सरकारी भीक आयली काय म्हणून वासपूस करतना दिसतात. हांकां ही सवलत मेळप योग्य? सरकारान प्रधानमंत्र्याचें आयकून ह्यो रेवड्यो वाटपाचें बंद केल्यार बरें. फकत गृह आधारूच न्हय तर रेशनाचें धान्य कोण व्हरता ताचीय चवकशी जावंक जाय. सवलती फकत त्याच लोकांक मेळच्यो जांकां जाण्टेपणांतूय काबाड कश्ट करचे पडटात, माथ्यार वजें घेवचें पडटा. गाडयेकारांक न्ही.
अभयकुमार वेलिंगकार
9423884687
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
