भांगरभूंय | प्रतिनिधी
केंद्रीय मंत्री स्मृती इराणी कडल्यान काँग्रेस फुडाऱ्यांक नोटिशी
पणजी : केंद्रीय मंत्री स्मृती इराणी हांच्या रॅस्टोरॅण्टा आड जो मेरेन कारवाय जायना, तो मेरेन काँग्रेस पक्षाचे आंदोलन सुरूच उरतलें अशें प्रदेश काँग्रेस अध्यक्ष अमीत पाटकार हांणी सांंगलें. युवा काँग्रेसीच्या कार्यकर्त्यांनी आयतारा आसगांवां हांंगा रॅस्टोरॅण्टा मुखार निदर्शनां केलीं.
मजगतीं, आसगांवां बार अॅण्ड रॅस्टोरॅण्टा मुखार युवक काँग्रेसीच्या कार्यकर्त्यांनी निदर्शनां केलीं. केंद्रीय मंत्री स्मृती इराणीच्या राजिनाम्याची मागणी केली. ह्या वेळार स्मृती इराणी आड घोशणा दिल्यो. निदर्शनां केले उपरांत कार्यकर्त्यांनी रॅस्टोरॅण्ट आनी बार्रा खातीर कुलप आनी चावी पुलिसां कडेन दिली.
शेनवारा महिला काँग्रेसीच्या कार्यकर्त्यांनी केंद्रीय मंत्री स्मृती इराणी आड निदर्शनां केल्लीं.
केंद्रीय मंत्री स्मृती इराणी हांच्या कुटुंबाचें आसगांवां बेकायदाे रॅस्टोरॅण्ट आनी बार आशिल्ल्याचो आरोप काँग्रेसीन केला. रॅस्टोरॅण्टा खातीर परवानो नासतना बार्राक परवानो दिवपाक मेळना. अबकारी खात्यान बेकायदाे परवानो दिला. हो परवानो रद्द करचो अशी मागणी आसा. 18 फेब्रुवारी 2021 ह्या दिसा हो परवानो दिल्ल्याच्यो नोंदी आसात.
अबकारी खात्यान 30 डिसेंबर 2020 दिसग अँथनी दगामा हाका परवानो दिला. हो मनीस मुंंबयचो रहिवासी आसा अशी नोंद आसा. हो परवानाे आशिल्लें रॅस्टोरॅण्ट आनी बार स्मृती इराणी हांचें कुटुंब चलयता अशे आरोप जातात.
केंद्रीय मंत्री स्मृती इराणी हांणी बदनामी खातीर काँग्रेस फुडाऱ्यांक नोटिशी जारी केल्यात. काँग्रेस फुडारी पवन खेरा, जयराम रमेश आनी नेट्टा डिसोझा हांकां नोटिशी जारी जाल्यात. बदनामी करपा खातीर आपले आड तथ्यहीन आरोप केले, म्हूण नोटिशी जारी केल्यात. म्हजे धुवे आड फटीचे आरोप जायत आसून लिखीत स्वरुपांत माफी मागची. तशेंच सगले आरोप फाटी घेवचे अशी मागणी हे नोटिशींत आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.