भांगरभूंय | प्रतिनिधी
डॉ. आमशेकार: वाळपय आदले सैनीक संघटणे वतीन मनयलो कारगील विजय दीस
वाळपय: कारगील जैत हें दरेकल्याच्या मनांत अभिमान निर्माण करपी खीण आशिल्लो. आमच्या सैन्यांनी आपल्या जिवाची पर्वा करिनासतना विरोधकांक नानपयत करपाचे नदरेन कारगील युद्धांत येस मेळयलें. ताका लागून ह्या लढ्यांत योगदान दिवपी दरेका सैनिकांचो आमकां अभिमान आसा. दरेका भारतीयान तांच्या ह्या येसाचे लढायेचो वैचारीक भाग करचो, अशें आवाहन सामाजीक कार्यकर्ते डॉ. अशोक आमशेकार हांणी केलें.
वाळपय हांगच्या शहीद स्तंभ हांगा देशा खातीर शहीद जाल्ल्या जवानांक आर्गां ओंपून आदले सैनीक संघटणे वतीन कारगील विजय दीस मनयलो. ह्या वेळार डॉ. आमशेकार मुखेल सोयरे म्हणून उलयताले.
अशे तरेचे उपक्रम सतत आयोजीत करप गरजेचें. दरेका भारतियाच्या मनांत राष्ट्रभक्तीची वात पेटोवप गरजेचें. आदले सैनीक संघटणे वतीन आयोजीत केल्ले हे कार्यावळी खातीर डॉ. आमशेकार हांणी तांकां परबीं भेटयलीं.
ह्या वेळार सैनीक संघटणेचे कृष्णा माजीक,
सागर सावंत, चंदन ठाकूर, दामोदर गांवकार, प्रमोद गांवकार, गौरेश गांवस, सुरेश कुमार, गिरीष गांवस, अमर माजीक, संदीप गांवस, सिद्धेश गडेकार, दिनेश गांवकार, दिलीप गांवस, सत्तरी अर्बन कॉ. सोसायटीचे वेवस्थापकीय संचालक लक्ष्मण गांवस, जनावरांचे इश्ट प्रदिप गंवडळकार, सरकारी माध्यमीक विद्यालयाचे मुख्याध्यापक काशिनाथ नायक तशेंच हेर नागरीक व्हडा संख्येन हाजीर आशिल्ले.
कारगील विजय दीस मनोवपा खातीर वाळपयच्या सरकारी मुळाव्या विद्यालयांतले विद्यार्थी आनी शिक्षक हाजीर आशिल्ले. मानेस्तां हस्तुकीं शहीद जवानांक फुलां अर्पण केलीं.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
