भांगरभूंय | प्रतिनिधी
कामचुकार कर्मचाऱ्यांक आतां सीआरएस वा व्हीआरएस
पणजी : जांकां काम करपाची इत्सा आसना ते मुखेलपणान सरकारी नोकरे फाटल्यान धांवतात. सरकारी नोकरी म्हणल्यार बसून खावप असो समज आसा. सरकारी नोकरेची वाट पळय नासताना तरणाट्यांनी शिक्षण वा कुशळटाय प्रशिक्षण घेवन खासगी नोकरी मेळोवपाचे यत्न करचे अशें मुख्यमंत्री डॉ. प्रमोद सावंत हांणी सांगलें.
कुडण्यां रोजगार मेळाव्याचें उक्तावण केले उपरांत ते उलयताले. इतलो तेप सरकारी नोकरी म्हणल्यार चैनीची गजाल आसली. हाचे मुखार अशें चलचें ना. सरकारी कर्मचाऱ्यांचेर सरकाराची नदर आसतली. कामचुकार कर्मचाऱ्यांचेर कारवाय जातली. जे कर्मचारी काम करिनात वा शिस्त पाळिनात तांचेर घरा बसपाची वेळ येतली. तांकां सीआरएस वा व्हीआरएस घेवची पडटली. सरकारी कर्मचाऱ्यांच्या वावराचें मुल्यमापन जातलें अशें मुख्यमंत्री डॉ. प्रमोद सावंत हांणी सांगलें.
खण वेवसाय बंद आसा. कोरोनाक लागून पर्यटनांत लेगीत मंदी आसली. हाका लागून बेकारी वाडल्या. तरी बेरोजगारीचें प्रमाण राज्यांत चड ना. हेर राज्यांचे तुळेन तें उणे आसा. बेरोजगारीच्या प्रमाणाची चुकीची आंकडेवारी जाहीर जाता अशें मुख्यमंत्री डॉ. प्रमोद सावंत हांणी सांगलें.
बंद आशिल्लो खण वेवसाय सुरू करपा खातीर प्रक्रिया सुरू आसा. आनीक थोड्याच तेपान खणी सुरू जातल्यो. पर्यटन आतां पयली भशेन उबारी घेता. ते भायर सरकारान स्टार्ट अप धोरण जाहीर केलां. राज्यात सटार्ट अप सुरू जावपाक लागल्या. आयटी तशेच इलेक्ट्रॉनीक उद्देग सुरू जावपाचे आसा. मोपा विमानळा उपरांत नवे उद्देग तशेंच सेवा सुरू जातल्यो. हाका लागून खासगी वाठारांनी बऱ्योच नोकऱ्यो तयार जावपाच्यो आसात. विद्यार्थ्यांनी आयटी, पर्यटन, हॉस्पिटेलिटी ह्या वाठारांत कुशळटाचे शिक्षण घेवन नोकरी मेळोवपाचे येत्न करचे अशें मुख्यमंत्री डॉ. प्रमोद सावंत हांणी सांगलें.
राज्यांत स्वयंपूर्ण गोंय मोहीम सुरू आसा. शेती, दूद उत्पादन, प्रक्रिया अशे उद्देग सुरू करपाक वाव आसा. तरणाट्यांनी उद्देग सुरू करून हेरांक नोकऱ्यो दिवपाचें सपन बाळगुपाक जाय. सगल्याक कुशळटाय अभ्यासक्रम सुरू जाल्यात. ते भायर स्पर्धात्मक परिक्षेचे तयारी खातीर वर्ग सुरू जाल्यात अशें मुख्यमंत्र्यांनी सांगलें.
कुडण्यां महालक्ष्मी विद्यालयांत माया एचआर सोलुशना वतीन रोजगार मेळावो जालो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
